ആരോപണവിദേയനായ രാഹുല്‍ മാങ്കൂട്ടത്തില്‍ എം.എല്‍.എയുടെ തിരുവനന്തപുരം തൃക്കണ്ണാപുരത്തെഫ്‌ളാറ്റ് കേന്ദ്രീകരിച്ച് അന്വേഷണം വേണമെന്ന് ബി.ജെ.പി പാലക്കാട് ജില്ലാ പ്രസിഡന്റ് പ്രശാന്ത് ശിവന്‍ ആവശ്യപ്പെട്ടു. ജനുവരി, മേയ് മാസങ്ങളിലെ ഫ്‌ളാറ്റിലെ സിസി ടിവി ദൃശ്യങ്ങള്‍ പരിശോധിക്കണം. ജനുവരി 27, 28 തിയതികളിലും, മേയ് 25 നും പാലക്കാട്ടെ രാഹുലിന്റെ ഫ്‌ളാറ്റില്‍ ആരെല്ലാം വന്നിട്ടുണ്ടെന്ന് പരിശോധിക്കണമെന്നും അദ്ദേഹം പറഞ്ഞു. മാദ്ധ്യമ പ്രവര്‍ത്തകരോട് സംസാരിക്കുകയായിരുന്നു പ്രശാന്ത് ശിവന്‍.

ഇതിനകം പുറത്തു വന്ന ശബ്ദ സന്ദേശം തന്റേതല്ലെന്ന് രാഹുല്‍ മാങ്കൂട്ടത്തില്‍ പറഞ്ഞിട്ടില്ല. ഇത് പ്രചരിപ്പിച്ചവര്‍ക്കെതിരെ നിയമനടപടിയെടുക്കുമെന്ന് കോണ്‍ഗ്രസിന്റെ ഒരു നേതാവും പറഞ്ഞില്ല. രാഹുല്‍ മാങ്കൂട്ടത്തിലിന്റെ മോശം പെരുമാറ്റത്തെക്കുറിച്ച് പറയാന്‍ അവന്തിക തന്നെ സമീപിച്ചിരുന്നു എന്നും പ്രശാന്ത് ശിവന്‍ വെളിപ്പെടുത്തി.

പുറത്ത് പറയാന്‍ ഭയമുണ്ടെന്ന് അവന്തിക പറഞ്ഞു. കാര്യങ്ങള്‍ പുറത്ത് പറയാന്‍ അവന്തികയ്ക്ക് ധൈര്യം നല്‍കിയത് താനാണ്. അവന്തികയെ ആദ്യമായി കാണുന്നത് യുവ മോര്‍ച്ച പരിപാടിയില്‍ വച്ചാണ്. അവന്തികയും രാഹുലും തമ്മിലെ ബന്ധം അറിയില്ല. ഇന്‍സ്റ്റഗ്രാം വഴിയാണ് അവന്തിക ബന്ധപ്പെട്ടത്. ഒരു പെണ്‍കുട്ടിയെ നിര്‍ബന്ധിച്ച് ഗര്‍ഭഛിദ്രം നടത്താന്‍ പ്രേരിപ്പിക്കുന്ന ഓഡിയോ സന്ദേശം രാഹുല്‍ നിഷേധിച്ചിട്ടില്ലെന്നും പ്രശാന്ത് ശിവന്‍ ചൂണ്ടിക്കാട്ടി.