ഇടുക്കി എഴുകുംവയലില്‍ ഓടികൊണ്ടിരുന്ന കാറിന് തീപിടിച്ചു. എഴുകുംവയല്‍ സ്വദേശി തോലാനി ജിയോ ജോര്‍ജിന്റെ കാറിനാണ് തീപിടിച്ചത്. പിന്നാലെ കാര്‍ പൂര്‍ണ്ണമായും കത്തിനശിച്ചു. പുലര്‍ച്ചെ 5.15 ഓടെയായിരുന്നു സംഭവം ഉണ്ടായത്. രാവിലെ പള്ളിയിലേക്ക് പോകുന്നതിനിടെ കയറ്റത്തില്‍ വെച്ച് പെട്ടന്ന് കാറില്‍ നിന്ന് തീ ഉയരുകയായിരുന്നു.

ഉടന്‍ തന്നെ കാറില്‍ ഉണ്ടായിരുന്നവര്‍ പുറത്തിറങ്ങി. ജിയോയും ഭാര്യയും മൂന്ന് കുട്ടികളും ഭാര്യ മാതാവുമാണ് കാറില്‍ ഉണ്ടായിരുന്നത്. വാഹനത്തില്‍ നിന്ന് ഇറങ്ങുന്നത്തിനിടെ ജിയോയ്ക്കും ഭാര്യയ്ക്കും നേരിയ പൊള്ളലേറ്റു. വാഹനത്തില്‍ നിന്ന് ഇറങ്ങി രക്ഷപ്പെടാന്‍ ശ്രമിയ്ക്കുന്നതിനിടെ കുട്ടികള്‍ നിലത്ത് വീണും നേരിയ പരിക്ക് പറ്റി. ഇവരെ കട്ടപ്പനയിലെ സ്വകാര്യ ആശുപത്രിയില്‍ പ്രവേശിപ്പിച്ചു. നാട്ടുകാരും ഫയര്‍ ഫോഴ്‌സും ചേര്‍ന്നാണ് തീ അണച്ചത്. തീപിടുത്തത്തില്‍ കാര്‍ പൂര്‍ണ്ണമായും കത്തി നശിച്ചു.