കൊല്ലം കല്ലുവാതുക്കലില്‍ കിണറ്റില്‍ വീണ യുവാവിനെ രക്ഷിക്കുന്നതിനിടെ കയര്‍ പൊട്ടി അപകടം. കിണറ്റില്‍ വീണയാളും രക്ഷിക്കാന്‍ ഇറങ്ങിയയാളും മരിച്ചു. കിണറ്റില്‍ വീണ കല്ലുവാതുക്കല്‍ സ്വദേശി വിഷ്ണു (23), രക്ഷിക്കാന്‍ ഇറങ്ങിയ മയ്യനാട് ധവളക്കുഴി സ്വദേശി ഹരിലാല്‍ (24) എന്നിവരാണ് മരിച്ചത്. ഇന്ന് വൈകിട്ടാണ് അപകടം നടന്നത്.

വെള്ളത്തില്‍ നിന്ന് പുറത്തെടുത്ത വിഷ്ണുവുമായി ഹരിലാല്‍ കിണറിന് മുകളിലേക്ക് കയറുന്നതിനിടെ കയര്‍ പൊട്ടി ഇരുവരും താഴേക്ക് വീഴുകയായിരുന്നു. വിഷ്ണു കിണറ്റില്‍ വീണപ്പോള്‍ വീട്ടുകാരുടെ നിലവിളി കേട്ട് ഓടിയെത്തിയതായിരുന്നു സമീപത്തെ സ്വകാര്യ ഫാക്ടറിയിലെ ജീവനക്കാരനായ ഹരിലാല്‍. വിഷ്ണുവുമായി കിണറിന്റെ മദ്ധ്യഭാഗത്ത് എത്തിയപ്പോഴാണ് കയര്‍ പൊട്ടിയതെന്ന് ദൃക്‌സാക്ഷികള്‍ പറഞ്ഞു. മൃതദേഹങ്ങള്‍ പാരിപ്പള്ളി മെഡിക്കല്‍ കോളേജ് ആശുപത്രിയിലേക്ക് മാറ്റി.