മുഖ്യമന്ത്രി എന്നോടൊപ്പം (സി.എം വിത്ത് മി) സിറ്റിസണ് കണക്ട് സെന്റര് പ്രവര്ത്തനം ആരംഭിച്ചു
പൊതുജനങ്ങളുടെ അഭിപ്രായങ്ങളും നിര്ദ്ദേശങ്ങളും പരാതികളും മുഖ്യമന്ത്രിയെ നേരിട്ട് അറിയിക്കുന്നതിനായി നടപ്പാക്കുന്ന ' മുഖ്യമന്ത്രി എന്നോടൊപ്പം ' (സി.എം വിത്ത് മി) സിറ്റിസണ് കണക്ട് സെന്റര് പ്രവര്ത്തനം ആരംഭിച്ചു. പദ്ധതിയുടെ ഉദ്ഘാടനം മുഖ്യമന്ത്രി പിണറായി വിജയന് നിര്വഹിച്ചു. നടന് ടൊവിനോ തോമസ് ആയിരുന്നു ആദ്യ കോള് വിളിച്ചത്. ഈ പരിപാടി സ്വാഗതാര്ഹമാണെന്ന് ടൊവിനോ പറഞ്ഞു. അഭിപ്രായം വിലപ്പെട്ടതെന്ന് മുഖ്യമന്ത്രിയും മറുപടി നല്കി 18004256789 എന്ന ടോള് ഫ്രീ നമ്പരിലാണ് സേവനം ലഭ്യമാകുക.
ഭരണസംവിധാനത്തിന്റെ പരമമായ ഉത്തരവാദിത്തം ജനങ്ങളോടാണെന്നും ഈ തത്വം അക്ഷരാര്ത്ഥത്തില് നടപ്പാക്കേണ്ടതുണ്ട് എന്ന ബോദ്ധ്യത്തോടെയാണ് എല്.ഡി.എഫ് സര്ക്കാര് പത്ത് വര്ഷത്തോളമായി പ്രവര്ത്തിച്ചതെന്നും മുഖ്യമന്ത്രി പറഞ്ഞു. സംസ്ഥാന സര്ക്കാരും പൊതുജനങ്ങളും തമ്മിലുള്ള ആശയവിനിമയം പരിപോഷിപ്പിക്കുക, ജനങ്ങളുടെ അഭിപ്രായങ്ങള് ഉള്ക്കൊള്ളുക, ജനങ്ങളുടെ പ്രശ്നങ്ങള്ക്ക് പരിഹാരം കാണുക, സര്ക്കാരിന്റെ പരിപാടികളും പദ്ധതികളും ജനങ്ങളില് എത്തിക്കുക എന്നിവ ലക്ഷ്യമിട്ടാണ് 'മുഖ്യമന്ത്രി എന്നോടൊപ്പം' സിറ്റിസണ് കണക്ട് സെന്റര് പ്രവര്ത്തനം ആരംഭിക്കുന്നത്. ഇന്ഫര്മേഷന് പബ്ലിക് റിലേഷന്സ് വകുപ്പിനാണ് സിറ്റിസണ് കണക്ട് സെന്ററിന്റെ നടത്തിപ്പ്, മേല്നോട്ട ചുമതല. കിഫ്ബിയാണ് അടിസ്ഥാന, സാങ്കേതിക സൗകര്യങ്ങള് ഒരുക്കുന്നത്.
വെള്ളയമ്പലത്തെ പഴയ എയര് ഇന്ത്യ ഓഫീസില് നടന്ന ചടങ്ങില് മന്ത്രി കെ. രാജന് അദ്ധ്യക്ഷത വഹിച്ചു. മന്ത്രിമാരായ റോഷി അഗസ്റ്റിന്, കെ.കൃഷ്ണന്കുട്ടി, എ.കെ .ശശീന്ദ്രന്, രാമചന്ദ്രന് കടന്നപ്പള്ളി, കെ.ബി. ഗണേഷ്കുമാര്, വി.ശിവന്കുട്ടി, ജി.ആര്. അനില് എന്നിവര് മുഖ്യാതിഥികളായി.
https://www.facebook.com/Malayalivartha
