തിരുവനന്തപുരം: തിരുവിതാംകൂർ ദേവസ്വം നിയമത്തിൽ ഭേഭഗതി കൊണ്ടുവരാൻ സർക്കാർ തലത്തിൽ ആലോചന. ദേവസ്വം ബോർ‍ഡ് പ്രസിഡന്‍റിന്‍റെയും അംഗങ്ങളുടെയും കാലാവധി നീട്ടി നൽകും വിധത്തിൽ ഭേദഗതി കൊണ്ടുവരാനാണ് നീക്കം. നിലവിൽ തിരുവിതാംകൂർ ദേവസ്വം ബോർഡിന്റെ കാലാവധി രണ്ടു വർഷമാണ്.

മലബാർ, ​ഗുരുവായൂർ ദേവസ്വം നിയമങ്ങളിൽ സർക്കാരിന് വേണമെങ്കിൽ അം​ഗങ്ങളുടെയോ പ്രസിഡന്റിന്റെയോ കാലാവധി നീട്ടി നൽകാമെന്ന് ചട്ടത്തിൽ പറയുന്നുണ്ട്. എന്നാൽ തിരുവിതാംകൂർ ദേവസ്വം നിയമത്തിൽ ഇത് അനുവദിക്കുന്നില്ല. മുൻ ദേവസ്വം മന്ത്രി കെ രാധാകൃഷ്ണന്റെ കാലത്തു തന്നെ തിരുവിതാംകൂർ ദേവസ്വം നിയമത്തിൽ ഭേ​ദ​ഗതി നടത്തുന്നത് സംബന്ധിച്ച് ചർച്ചകൾ നടന്നിരുന്നു.

നവംബർ മാസത്തിലാണ് തിരുവിതാംകൂർ ദേവസ്വം ബോർഡിന്റെ കാലാവധി അവസാനിക്കുക. തൊട്ടു പിന്നാലെ ശബരിമല സീസൺ ആരംഭിക്കുകയും ചെയ്യും. ഇതു കണക്കിലെടുത്ത് ബോർഡിന്‍റെ കാലാവധി ജൂൺ മുതൽ ജൂൺ വരെയാക്കുന്നതാണ് പരി​ഗണനയിലുള്ളത്. നിയമസഭ സമ്മേളനത്തിന് ശേഷം ഓർഡിനൻസ് കൊണ്ടു വരാനാണ് നീക്കം.