സങ്കടമടക്കാനാവാതെ വീട്ടുകാർ.... പെയിന്റിംഗ് ജോലിക്കിടെ കെട്ടിടത്തിൽ നിന്നും താഴെ വീണ് തൊഴിലാളിയ്ക്ക് ദാരുണാന്ത്യം. കുന്നത്തുകാല്‍ തച്ചന്‍കോട് തേരിവിള പുത്തന്‍വീട്ടില്‍ ഹരികുമാര്‍ (56) ആണ് മരിച്ചത്.

തമിഴ്നാട് പുരവൂരിലെ വീട്ടില്‍ ജോലിക്കിടെ ശനിയാഴ്ച വൈകുന്നേരം അഞ്ച് മണിയോടെ വീടിന്റെ സണ്‍ഷേഡില്‍ നിന്നും താഴേക്ക് വീഴുകയായിരുന്നു. വീഴ്ചയിൽ തലയ്ക്ക് ഗുരുതരമായി പരിക്കേറ്റ ഹരികുമാറിനെ ഉടന്‍ തന്നെ കാരക്കോണം മെഡിക്കല്‍ കോളെജില്‍ പ്രവേശിപ്പിച്ചുവെങ്കിലും രാത്രിയോടെ മരണത്തിന് കീഴടങ്ങി.

അപകടം നടന്ന സ്ഥലം തമിഴ്‌നാട് ആയതിനാല്‍ കന്നുമാമൂട് പൊലീസ് കേസെടുത്ത് മൃതദേഹം കുഴിത്തുറ ആശുപത്രിയില്‍ പോസ്റ്റ്‌മോര്‍ട്ടത്തിന് ശേഷം ഇന്നലെ വൈകുന്നേരത്തോടെ സംസ്‌കരിച്ചു. ഭാര്യ- അമ്പിളി ,മക്കള്‍ രാഹുല്‍, ഹരിത.