മകനെ ട്യൂഷൻ ക്ളാസിൽ കൊണ്ടാക്കാനായി പോകുന്നതിനിടെ കാറിൽ ലോറിയിടിച്ച് വീട്ടമ്മയ്‌ക്ക് ദാരുണാന്ത്യം. ദേശീയപാതയിൽ ആറ്റിങ്ങൽ തോട്ടയ്‌ക്കാട് പാലത്തിനടുത്താണ് ഇ‌ന്ന്‌ രാവിലെ ആറ് മണിയോടെയായിരുന്നു സംഭവം നടന്നത്. തോട്ടയ്‌ക്കാട് സ്വദേശി മീന (40) ആണ് മരിച്ചത്. ഒപ്പമുണ്ടായിരുന്ന ഒൻപതാം ക്ളാസ് വിദ്യാർത്ഥിയായ മകൻ അഭിമന്യുവിന് അപകടത്തിൽ പരിക്കേറ്റു.

കാറിൽ വരികയായിരുന്ന മീനയും മകനും തോട്ടയ്‌ക്കാട് പാലത്തിന് സമീപത്തായി യു ടേൺ എടുക്കവെ അതുവഴി വന്ന ലോറി ഇടിക്കുകയായിരുന്നു. കഴിഞ്ഞമാസവും ഇവിടെ നിരവധി വാഹനങ്ങൾ ഒരുമിച്ച് കൂട്ടിയിടിച്ച് അപകടമുണ്ടായിരുന്നു. കാറിടിച്ച് പിക്കപ്പ് വാൻ മറിയുകയും മറ്റ് വാഹനങ്ങളിൽ ഇടിക്കുകയുമായിരുന്നു. എന്നാൽ അന്ന് ആർക്കും ജീവന് അപകടം ഉണ്ടായില്ലായിരുന്നു.