കേരളത്തിന്റെ ഭാവി വികസന ലക്ഷ്യങ്ങൾ ആസൂത്രണം ചെയ്യുന്നതിനായി സംഘടിപ്പിക്കുന്ന വിഷൻ 2031ന്റെ ഭാഗമായി ഭക്ഷ്യ പൊതുവിതരണവകുപ്പിന്റെ സെമിനാർ ഒക്ടോബർ 10ന് നടത്തുമെന്ന് മന്ത്രി ജി ആർ അനിൽ .

രാജ്യത്തിനാകെ മാതൃകയായ പൊതു വിതരണ സംവിധാനവും വിപണി ശൃംഖലയുമാണ് കേരളത്തിൽ ഉള്ളത്. ഭക്ഷ്യ ഭദ്രത ഉറപ്പ് വരുത്താനും വിശപ്പ് രഹിതകേരളം സൃഷ്ടിക്കാനും ഈ സർക്കാരിന് കഴിഞ്ഞു. സപ്ലൈക്കോയുടെ 1600ലധികം വില്പനശാലകളിലൂടെ അവശ്യ സാധന ലഭ്യതയും വിലക്കുറവും ഉറപ്പ് വരുത്തുന്നുണ്ട്. നവകേരളം പോഷക ഭദ്രതയുടെ കേരളം കൂടി ആയിരിക്കണമെന്നും സപ്ലൈക്കോയുടെ സുവർണ ജൂബിലി ആഘോഷിക്കുന്ന സന്ദർഭത്തിലാണ് സെമിനാർ സംഘടിപ്പിക്കുന്നതെന്നും മന്ത്രി പറഞ്ഞു..

ഒക്ടോബർ 10ന് രാവിലെ 10 മുതൽ നിശാഗന്ധിയിൽ നടക്കുന്ന സെമിനാർ ധനകാര്യ വകുപ്പ് മന്ത്രി കെ.എൻ. ബാലഗോപാൽ ഉദ്ഘാടനം ചെയ്യും. ഭക്ഷ്യ പൊതുവിതരണ വകുപ്പ് മന്ത്രി ജി ആർ അനിൽ അധ്യക്ഷത വഹിക്കും. വകുപ്പ് സെക്രട്ടറി എം ജി രാജമാണിക്യം വകുപ്പിന്റെ നേട്ടങ്ങൾ അവതരിപ്പിക്കും.

തുടർന്ന്, 'ആഗോള ഭക്ഷ്യഭദ്രതാ ഭൂപടത്തിൽ കേരളത്തിന്റെ സ്ഥാനം' എന്ന വിഷയത്തിൽ സെമിനാർ നടക്കും. രണ്ട് മണി മുതൽ കനകക്കുന്ന് കൊട്ടാരം ഓഡിറ്റോറിയത്തിൽ 'ഭക്ഷ്യ ഭദ്രതയിൽ നിന്നും പോഷക ഭദ്രതയിലേക്ക് ', 'ഉപഭോക്തൃ മേഖല ചൂഷണ മുക്തം, സംതൃപ്തം' വിഷയങ്ങളിലും പാനൽ ചർച്ചയുണ്ടാകും. വൈകിട്ട് നാലിന് പാനൽ റിപ്പോർട്ട് അവതരണം മന്ത്രി ജി ആർ അനിൽ നടത്തും. വിവിധ മേഖലകളിൽ നിന്നുള്ള വിദഗ്ധരും, പ്രതിനിധികളും സെമിനാറിൽ പങ്കെടുക്കും.