തിരുവനന്തപുരം- ബം​ഗലൂരു ഹംസഫർ എക്സ്പ്രസിന് കായംകുളത്ത് സ്റ്റോപ്പ് അനുവദിച്ചതായി കേന്ദ്ര റയിൽ മന്ത്രി അശ്വിനി വൈഷ്ണവ് അറിയിച്ചു. ബം​ഗളൂരുവിലേക്കുള്ള ട്രയിനിന് സ്റ്റോപ്പ് അനുവദിക്കണമെന്ന് ആവശ്യപ്പെട്ട് ട്രയിൽ യാത്രക്കാരുടെ സംഘടന ബിജെപി ജില്ലാ അദ്ധ്യക്ഷൻ സന്ദീപ് വാചസ്പതിക്ക് നിവേദനം നൽകിയിരുന്നു.   ഈ നിവേദനങ്ങൾ ബിജെപി സംസ്ഥാന അ​ദ്ധ്യക്ഷൻ രാജീവ് ചന്ദ്രശേഖർ മുഖാന്തിരം കേന്ദ്ര റെയിൽ മന്ത്രിക്ക് കൈമാറി. കേന്ദ്രമന്ത്രി അശ്വിനി വൈഷ്ണവുമായി നടത്തിയ കൂടിക്കാഴ്ചയിൽ ബിജെപി സംസ്ഥാന അദ്ധ്യക്ഷൻ ഇക്കാര്യം ആവശ്യപ്പെടുകയും ചെയ്തിരുന്നു. ഇതേ തുടർന്നാണ് ട്രയിനിന് സ്റ്റോപ്പ് അനുവദിച്ച് ഉത്തരവായത്. ഹംസഫർ എക്സ്പ്രസിന് സ്റ്റോപ്പ് അനുവദിക്കുന്നതോടെ ബം​ഗളൂരിവിലേക്കും കായംകുളത്തേക്കും യാത്ര ചെയ്യുന്ന ആയിരക്കണക്കിന് ആൾക്കാർക്കാണ് പ്രയോജനം കിട്ടുക.     ഹംസഫർ എക്സ്പ്രസിന് കായംകുളത്ത് സ്റ്റോപ്പ് അനുവദിച്ച കേന്ദ്ര റയിൽമന്ത്രി അശ്വിനി വൈഷ്ണവിനെയും അതിനായി ഇടപെടീൽ നടത്തിയ ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖറിനെയും അഭിനന്ദിക്കുന്നതായി ബിജെപി ജില്ലാ അധ്യക്ഷൻ സന്ദീപ് വാചസ്പതി പറഞ്ഞു.   ആയിരക്കണക്കിന് യാത്രക്കാർക്ക് പ്രയോജനം കിട്ടുന്ന ഈ തീരുമാനം എടുത്തതിന് ഇരുവരും അഭിനന്ദനം അർഹിക്കുന്നു. സാധാരണ ജനങ്ങളോടുള്ള മോദി സർക്കാരിൻ്റെയും ബിജെപിയുടെയും പ്രതിബദ്ധതയാണ് ഇതിലൂടെ വെളിവായതെന്നും അദ്ദേഹം പറഞ്ഞു. "