മലപ്പുറം വളാഞ്ചേരിയില്‍ അന്ധനായി അഭിനയിച്ച് ഭിക്ഷാടനം നടത്തിയിരുന്ന ആളുടെ കള്ളത്തരം കണ്ടുപിടിച്ച് നാട്ടുകാര്‍. ആളൊഴിഞ്ഞ സ്ഥലത്തിരുന്ന് പണം എണ്ണി നോക്കിയതാണ് കോട്ടയം സ്വദേശി ഹംസയെ കുടുക്കിയത്. ഹംസ വളാഞ്ചേരിയില്‍ എത്തിയത് രണ്ട് മാസം മുമ്പാണ്. കറുത്ത കണ്ണടയും വച്ച് അന്ധനാണെന്നും പറഞ്ഞായിരുന്നു ഇയാള്‍ ഭിക്ഷാടനം നടത്തിയത്. ആളുകളൊക്കെ ഇയാള്‍ക്ക് പണം കൊടുത്ത് സഹായിച്ചു. കണ്ണ് കാണാത്തവര്‍ക്കായുള്ള പുനരധിവാസ കേന്ദ്രത്തിലേക്ക് മാറ്റാമെന്ന് നാട്ടുകാര്‍ പറഞ്ഞു എന്നാല്‍ ഹംസ ഇത് നിരസിക്കുകയായിരുന്നു.

ഇതോടെയാണ് വളാഞ്ചേരിക്കാര്‍ക്ക് സംശയം തോന്നിയത്. ഇന്ന് പുലര്‍ച്ചെ ആളൊഴിഞ്ഞ സ്ഥലത്തേക്ക് ഹംസ പോകുന്നത് നാട്ടുകാരില്‍ ചിലര്‍ കണ്ടു. പിന്നെ കാണുന്നത് കറുത്ത കണ്ണട ഊരി മാറ്റിയ ശേഷം കൈവശമുണ്ടായിരുന്ന പണം എണ്ണുന്ന ഹംസയെയാണ്. കള്ളത്തരം കയ്യോടെ പിടിച്ചപ്പോള്‍ ഹംസയ്ക്കും കള്ളി സമ്മതിക്കേണ്ടി വന്നു.