ദീപാവലി ആഘോഷങ്ങള്‍ക്കിടെ ദുബായില്‍ മലയാളി വിദ്യാര്‍ത്ഥി ഹൃദയാഘാതം മൂലം മരിച്ചു. ബിബിഎ മാര്‍ക്കറ്റിംഗ് ഒന്നാം വര്‍ഷ വിദ്യാര്‍ത്ഥിയും മാവേലിക്കര സ്വദേശിയുമായ വൈഷ്ണവ് കൃഷ്ണകുമാര്‍ (18) ആണ് മരിച്ചത്. ചൊവ്വാഴ്ച രാത്രി ദുബായിലെ ഇന്റര്‍നാഷണല്‍ അക്കാദമിക് സിറ്റിയില്‍ കുഴഞ്ഞുവീഴുകയായിരുന്നു. ഉടന്‍ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാന്‍ കഴിഞ്ഞില്ല. വി ജി കൃഷ്ണകുമാര്‍ വിധു കൃഷ്ണകുമാര്‍ ദമ്പതികളുടെ മകനാണ്. സഹോദരി വൃഷ്ടി കൃഷ്ണകുമാര്‍. 20 വര്‍ഷമായി വൈഷ്ണവിന്റെ കുടുംബം യുഎഇയിലാണ് താമസിക്കുന്നത്.

മരണകാരണം സംബന്ധിച്ച് ഫോറന്‍സിക് പരിശോധന നടക്കുകയാണ്. നേരത്തെ ജെംസ് ഔര്‍ ഓണ്‍ ഇന്ത്യന്‍ സ്‌കൂളിലെ ഹെഡ് ഓഫ് സ്‌കൂള്‍ കൗണ്‍സില്‍ ആയിരുന്നു വൈഷ്ണവ്. കൂടാതെ മോഡല്‍ യുണൈറ്റഡ് നേഷന്‍സ് ക്ലബ്ബിന്റെയും ഡിബേറ്റിംഗ് സൊസൈറ്റിയുടെയും പ്രസിഡന്റായി പ്രവര്‍ത്തിച്ചിരുന്നു. ഇതേ സ്‌കൂളിലെ അദ്ധ്യാപികയാണ് വൈഷ്ണവിന്റെ മാതാവ്. 2024ലെ സിബിഎസ്ഇ പ്ലസ് ടു പരീക്ഷയില്‍ 97.4 ശതമാനം മാര്‍ക്ക് നേടി എല്ലാ വിഷയങ്ങള്‍ക്കും എ വണ്‍ ഗ്രേഡ് കരസ്ഥമാക്കിയിരുന്നു. മാര്‍ക്കറ്റിംഗ്, എന്റര്‍പ്രണര്‍ഷിപ്പ് വിഷയങ്ങളില്‍ നൂറില്‍ നൂറ് മാര്‍ക്ക് നേടി. ഈ നേട്ടങ്ങളുടെ അടിസ്ഥാനത്തിലാണ് വൈഷ്ണവിന് യുഎഇ ഗോള്‍ഡന്‍ വിസ ലഭിച്ചത്.

വിദ്യാഭ്യാസത്തിന് പുറമെ സാമ്പത്തിക ഉപദേശങ്ങള്‍, ലൈഫ്‌സ്‌റ്റെല്‍ മോട്ടിവേഷന്‍, വ്യായാമം എന്നിവ സംബന്ധിച്ച് സോഷ്യല്‍ മീഡിയയില്‍ വൈഷ്ണവ് സജീവമായിരുന്നു. ഒട്ടേറെ കമ്പനികളില്‍ ഇന്റേണ്‍ഷിപ്പുകള്‍ പൂര്‍ത്തിയാക്കിയ വൈഷ്ണവിന് സംരംഭകനാകാനായിരുന്നു ആഗ്രഹം. നിയമനടപടികള്‍ പൂര്‍ത്തിയാക്കിയ ശേഷം മൃതദേഹം നാട്ടിലേക്ക് കൊണ്ടുപോകും.