മലപ്പുറം തേ‍ഞ്ഞിപ്പലത്ത് വീട്ടുമുറ്റത്ത് കാറിന് തീപിടിച്ച് ഗുരുതരമായി പൊള്ളലേറ്റ് ചികിത്സയിലായിരുന്ന യുവാവ് മരിച്ചു. തേഞ്ഞിപ്പലം ചെനക്കലങ്ങാടി പള്ളിപ്പടിക്ക് സമീപം പൊറോളി അബ്ദുള്ള (ചേളാരി ജിഡിഎസ് മാർട്ട് എംഡി)യുടെ മകൻ ആദിൽ ആരിഫ്ഖാൻ(29) ആണ് മരിച്ചത്.

ഒക്ടോബർ 20-ന് അർധരാത്രിയോടെയായിരുന്നു അപകടം സംഭവിച്ചത്. ചേളാരി ഭാഗത്തുനിന്ന് വീട്ടിലേക്ക് വരികയായിരുന്ന ആദിൽ വീടിന് സമീപം കാർ നിർത്തി ഗെയ്റ്റ് തുറന്ന് വീണ്ടും കാർ സ്റ്റാർട്ടാക്കി മുന്നോട്ടെടുത്തപ്പോഴാണ് തീപിടിച്ചത്.

വാതിൽ തുറന്ന് പുറത്തിറങ്ങിയെങ്കിലും ഗുരുതരമായി പൊള്ളലേറ്റു. ഓടിക്കൂടിയ നാട്ടുകാർ ഏറെപരിശ്രമിച്ചാണ് തീ അണച്ചത്. ഗുരുതരമായി പൊള്ളലേറ്റ ആദിലിനെ ആദ്യം കോഴിക്കോട് മെഡിക്കൽ കോളേജ് ആശുപത്രിയിലും പിന്നീട് കോഴിക്കോട്ടെ സ്വകാര്യ ആശുപത്രിയിലും പ്രവേശിപ്പിച്ചിരുന്നു.

രണ്ടുദിവസം മുൻപ് വിദഗ്ധ ചികിത്സയ്ക്കായി ഡൽഹി എയിംസ് ആശുപത്രിയിലേക്ക് മാറ്റിയെങ്കിലും ഇന്നലെ പുലർച്ചെ മരണം സംഭവിക്കുകയായിരുന്നു.

അതേസമയം വിദേശത്ത് ജോലിയുള്ള ആദിൽ ഭാര്യയുടെ പ്രസവവുമായി ബന്ധപ്പെട്ടാണ് അടുത്തിടെ നാട്ടിലെത്തിയത്. വിദേശത്തേക്ക് തിരിച്ച് പോകാനിരിക്കവേയാണ് ദുരന്തം . മൃതദേഹം ചൊവ്വാഴ്ച രാത്രി ഡൽഹിയിൽനിന്ന് നെടുമ്പാശ്ശേരിയിലെത്തിച്ചു. കബറടക്കം ഇന്ന് നടന്നു. ഭാര്യ: ഷംല, രണ്ടുമാസം പ്രായമുള്ള കുട്ടിയുണ്ട്.