സംസ്ഥാനത്ത് മഴക്കാലം ശക്തിപ്പെടുന്നതോടെ, സിറ്റി പോലീസിനും, അഗ്നിശമന സേനാംഗങ്ങൾക്കും സഹായ ഹസ്തവുമായി മുന്നോട്ടു വന്നിരിക്കുകയാണ് പ്രമുഖ ആർട്ടിഫിഷ്യൽ ഇന്റലിജൻസ്, ഡിജിറ്റൽ ട്രാൻസ്‌ഫോർമേഷൻ സൊല്യൂഷൻസ് കമ്പനിയായ യു‌എസ്‌ടി. കമ്പനിയുടെ കോർപ്പറേറ്റ് സോഷ്യൽ റെസ്‌പോൺസിബിലിറ്റി (സി‌എസ്‌ആർ) സംരംഭത്തിന്റെ ഭാഗമായി, തിരുവനന്തപുരം സിറ്റി പോലീസിലെയും, അഗ്നിശമന സേനയിലെയും അംഗങ്ങൾക്ക് 125 മഴക്കോട്ടുകൾ സംഭാവന ചെയ്തു.

കഴക്കൂട്ടം പോലീസ് സ്റ്റേഷൻ, തുമ്പ പോലീസ് സ്റ്റേഷൻ, വലിയതുറ പോലീസ് സ്റ്റേഷൻ, ഫയർ ആൻഡ് റെസ്‌ക്യൂ വകുപ്പിന്റെ കഴക്കൂട്ടം സ്റ്റേഷൻ, എന്നിവിടങ്ങളിലെ ജീവനക്കാർക്കാണ് മഴക്കോട്ടുകൾ വിതരണം ചെയ്തത്.

പൊതുസ്ഥലങ്ങളിൽ ജോലി ചെയ്യുമ്പോൾ ഇടയ്ക്കിടെ പെയ്യുന്ന കനത്ത മഴയും ശക്തമായി വീശുന്ന കാറ്റും പോലീസിനും അഗ്നിശമന സേനാംഗങ്ങൾക്കും ഭീഷണിയായി മാറാറുണ്ട്. വരും ദിവസങ്ങളിൽ കനത്ത മഴയുണ്ടാകുമെന്ന് കാലാവസ്ഥാ പ്രവചനങ്ങൾ മുന്നറിയിപ്പ് നൽകിയതോടെ, അവരുടെ വെല്ലുവിളികളും പലമടങ്ങ് വർദ്ധിച്ചിരിക്കുകയാണ്. ഈ സാഹചര്യത്തിൽ, സംഭാവന ചെയ്ത റെയിൻ‌കോട്ടുകൾ ഉപയോഗപ്രദമാകുമെന്ന് യു‌എസ്‌ടിയിലെ സി‌എസ്‌ആർ വിഭാഗം വിശ്വസിക്കുന്നു.

റെയിൻ കോട്ടുകൾ കൈമാറുന്ന ചടങ്ങിൽ യു എസ് ടി വർക്ക് പ്ലെയ്സ് മാനേജ്‌മെന്റ് സീനിയർ ഡയറക്ടർ ഹരികൃഷ്ണൻ മോഹൻകുമാർ, സി എസ് ആർ ലീഡ് വിനീത് മോഹനൻ, വർക്ക് പ്ലെയ്സ് മാനേജ്‌മെന്റ് ടീമംഗം ഭദ്രകുമാർ കൃഷ്ണപ്പണിക്കർ, എന്നിവർ പങ്കെടുത്തു.

യുഎസ് ടി യോട് നന്ദി അറിയിച്ച കഴക്കൂട്ടം പോലീസ് സ്റ്റേഷനിലെ സബ് ഇൻസ്പെക്ടർ ആനന്ദ് കൃഷ്ണൻ, “പൊതുസ്ഥലത്ത് പോലീസ് സേനാംഗങ്ങൾ ജോലി ചെയ്യുമ്പോൾ കനത്ത മഴയിൽ അവർ ബുദ്ധിമുട്ടാറുണ്ട്. യുഎസ് ടി സംഭാവന ചെയ്ത റെയിൻകോട്ടുകൾ ധരിച്ചു കൊണ്ട് കനത്ത മഴയ്ക്കിടെ ഗതാഗത നിയന്ത്രണവും മറ്റ് പ്രധാന ജോലികളും കൈകാര്യം ചെയ്യുന്നത് എളുപ്പമാകും,” എന്ന് പറഞ്ഞു.

മഴക്കാലത്ത് കൂടുതൽ അപകടങ്ങൾ സംഭവിക്കുന്നതിനാൽ ഫയർ ആൻഡ് റെസ്ക്യൂ സേനാംഗങ്ങൾക്ക് നിരവധി വെല്ലുവിളികൾ നേരിടേണ്ടി വരുന്നു. കനത്ത മഴയിൽ നടത്തുന്ന രക്ഷാപ്രവർത്തനങ്ങളിൽ അവർക്കു ലഭിച്ച മഴക്കോട്ടുകൾ ഉപയോഗപ്രദമാകുമെന്നാണ് പ്രതീക്ഷ.