തിരുവനന്തപുരം ശ്രീ പത്മനാഭസ്വാമി ക്ഷേത്രത്തിൽ നിന്ന് സ്വർണം കാണാതായ സംഭവത്തിൽ 6 ജീവനക്കാരെ നുണപരിശോധനയ്ക്ക് വിധേയമാക്കാൻ കോടതി ഉത്തരവിട്ടു. തിരുവനന്തപുരം ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതിയുടേതാണ് ഉത്തരവ്. പ്രതികളെന്ന് സംശയിക്കുന്നവർ തങ്ങൾക്ക് മാത്രം അറിയാവുന്ന രഹസ്യം വെളിപ്പെടുത്താൻ നുണപരിശോധന അനിവാര്യമാണെന്ന ഫോർ‌ട്ട് പൊലീസ് അപേക്ഷയിലാണ് കോടതി ഉത്തരവ് .

നുണ പരിശോധനയ്ക്ക് മുൻപ് അനുമതി പത്രം വാങ്ങണമെന്നും കോടതി വ്യക്തമാക്കിയിട്ടുണ്ട്. ശ്രീകോവിലിൻറെ വാതിൽ സ്വർണം പൂശാൻ സ്ട്രോങ്ങ്‌ റൂമിൽ നിന്ന് എടുത്ത സ്വർണത്തിൽ നിന്ന് 13 പവൻ കാണാതായിയെന്നാണ് പരാതി.

പൊലീസ് അന്വേഷണം തുടങ്ങിയപ്പോൾ മണലിൽ പൊതിഞ്ഞ നിലയിൽ ക്ഷേത്രപരിസരത്ത് നിന്ന് സ്വർണം കണ്ടെത്തിയിരുന്നു. ഇക്കഴിഞ്ഞ മേയ് ഏഴിനും 10നും ഇടയിലാണ് സ്വർണം കാണാതായത്. ഇതെതുടർന്ന് ക്ഷേത്രം മാനേജർ ആണ് പൊലീസിൽ പരാതി നൽകിയത്. ക്ഷേത്രം പരിസരത്തെ മണലിൽ പൊതിഞ്ഞ നിലയിലാണ് സ്വർണം കണ്ടെത്തിയത്.