ബിഗ് ബോസ് സീസണ്‍ ഏഴില്‍ നാടകീയ നിമിഷങ്ങള്‍ക്കൊടുവില്‍ അനുമോളുടെ കൈ പിടിച്ചുയര്‍ത്തിയാണ് മോഹന്‍ലാല്‍ ബിഗ്‌ബോസ് വിന്നറെ പ്രഖ്യാപിച്ചത്. അനുമോള്‍ പിആറിനായി പതിനാറ് ലക്ഷം നല്‍കിയെന്ന് സഹമത്സരാര്‍ത്ഥികളടക്കം മുമ്പ് പറഞ്ഞിരുന്നു. അത്തരം പ്രചാരണത്തിന് മറുപടി നല്‍കിയിരിക്കുകയാണ് അനുമോള്‍ ഇപ്പോള്‍. 'വന്ന ടൈമിലേ എന്നെ പിആര്‍ പിആര്‍ എന്നും പറഞ്ഞ് കളിയാക്കിയിരുന്നു. എനിക്ക് പിആര്‍ ഇല്ലെന്ന് ഞാന്‍ ആരോടും പറഞ്ഞിട്ടില്ല. ഞാന്‍ ചിരിച്ചുകളയത്തേയുള്ളൂ. ഇവിടെ വരുന്നതിനുമുമ്പുതന്നെ എല്ലാവര്‍ക്കും പിആര്‍ ഉണ്ടെന്ന് എനിക്കറിയാമായിരുന്നു. വേണമെങ്കില്‍ എനിക്ക് വിളിച്ചുപറയാമായിരുന്നു. പക്ഷേ ഞാന്‍ മൈന്‍ഡ് ചെയ്തിട്ടില്ലായിരുന്നു.

ഇവിടെ വരുന്നതിന് മുമ്പ് പിആര്‍ ചെയ്യാമെന്ന് പറഞ്ഞ് പത്തിരുപത്തിയഞ്ച് പേര്‍ വിളിച്ചിട്ടുണ്ട്. ചിലര്‍ മനസറിയാന്‍ വേണ്ടിയായിരിക്കാം. പേയ്‌മെന്റൊന്നും തരണ്ട, അനുവിനെ ഇവിടംവരെ എത്തിച്ചെന്ന പേര് മതിയെന്നൊക്കെ മൂന്നാല് പേര്‍ പറഞ്ഞിട്ടുണ്ട്. ബിഗ് ബോസില്‍ എത്തിയിട്ട് ഒന്നും ചെയ്യാതിരുന്നാല്‍ അമ്പത് ലക്ഷം കൊടുത്താലും പിആറിന് ഒന്നും ചെയ്യാനാകില്ല.

ബിഗ് ബോസില്‍ ഇത്ര ദിവസം പിടിച്ചുനില്‍ക്കാനാകുമെന്ന് എനിക്കറിയായിരുന്നു. ആ വീട്ടില്‍ ഞാന്‍ അഭിനയിക്കുകയായിരുന്നില്ല, ജീവിക്കുകയായിരുന്നു. ഞാന്‍ കഷ്ടപ്പെട്ടിട്ടാണ് കപ്പ് കിട്ടിയത്. എനിക്ക് പിആര്‍ ഉണ്ട്. അത് പറയുന്നതിന് എനിക്കൊരു കുഴപ്പവുമില്ല. പക്ഷേ ഈ പറയുന്ന പതിനാറ് ലക്ഷമൊന്നും വാരിക്കോരി കൊടുത്തിട്ടില്ല. അത്രയും കാശുണ്ടായിരുന്നെങ്കില്‍ എനിക്ക് വീട്ടില്‍ നിന്നാല്‍ മതി. ഇവിടെ വരേണ്ട കാര്യമില്ലായിരുന്നു. വീട്ടില്‍ ആര്‍ക്കും താത്പര്യമില്ലായിരുന്നു. ഞാന്‍ നിര്‍ബന്ധിച്ചാണ് സമ്മതിപ്പിച്ചത്. പിആറിന് ഒരു ലക്ഷമാണ് കൊടുത്തത്. പൈസയുടെ കാര്യത്തില്‍ ഞാനൊരു പിശുക്കിയാണ്. വിളിച്ചവരാരും അനുവിനെ ജയിപ്പിച്ചുതരാമെന്ന് പറഞ്ഞിട്ടില്ല.' അനുമോള്‍ പറഞ്ഞു.