തൃശൂർ അതിരപ്പിള്ളി റോഡില്‍ കെ.എസ്.ആര്‍.ടി.സി ബസ് ബ്രേക്ക് ഡൗണായത് ആനക്കൂട്ടത്തിന് മുന്നിൽ. ചാലക്കുടിയിലേക്ക് വരികയായിരുന്ന കെ.എസ്.ആര്‍.ടി.സി. ബസാണ് വളവ് തിരിയുന്നതിനിടെ പെട്ടെന്ന് ബ്രേക്ക് ഡൗണായത്. അതിരപ്പിള്ളി റോഡില്‍ പ്ലാന്റേഷന്‍ റബര്‍ എസ്റ്റേറ്റിന് സമീപം തിങ്കളാഴ്ച രാവിലെയായിരുന്നു സംഭവം.

ചാലക്കുടിയിലേക്ക് വരികയായിരുന്ന കെ.എസ്.ആര്‍.ടി.സി. ബസാണ് വളവ് തിരിയുന്നതിനിടെ ആനക്കൂട്ടത്തിന് സമീപം കേടായത്. പ്രദേശവാസികളായ വിദ്യാര്‍ഥികളും തൊഴിലാളികളുമാണ് ബസിലുണ്ടായിരുന്നത്. ആനക്കൂട്ടത്തിന് പ്രകോപനം ഉണ്ടാക്കാതെ അവർ അതുവഴി വന്ന ബൈക്കുകളിലും നടന്നും വീടുകളിലേക്ക് പോകുകയായിരുന്നു. യാത്രക്കാര്‍ പ്രകോപനമുണ്ടാക്കാതിരുന്നതിനാല്‍ ആനക്കൂട്ടവും ശാന്തമായി തന്നെ നിലയുറപ്പിച്ചു. ആരെങ്കിലും പ്രകോപനമുണ്ടാക്കിയിരുന്നെങ്കിൽ ആനക്കൂട്ടം ആക്രമിച്ചേനെ. ഭാ​ഗ്യവശാൽ ആർക്കും ഒരാപത്തും വരാതെ എല്ലാവരും അവരവരുടെ വീടുകളിലെത്തി.
അതേസമയം ചാലക്കുടി ഡിപ്പോയില്‍ നിന്നും ജീവനക്കാരെത്തിയാണ് വഴിയില്‍ കിടന്ന ബസിന്റെ കേടുപാടുകള്‍ മാറ്റിയത്.