നക്സല് പ്രസ്ഥാനത്തിലെ പ്രധാനി വെള്ളത്തൂവല് സ്റ്റീഫന് അന്തരിച്ചു
മുന് നക്സല് നേതാവ് വെള്ളത്തൂവല് സ്റ്റീഫന് അന്തരിച്ചു. 82 വയസായിരുന്നു. കോതമംഗലം വടാട്ടുപാറയിലായിരുന്നു അന്ത്യം. അര്ബുദ ബാധിതനായ അദ്ദേഹം ഏറെ നാളായി ചികിത്സയിലായിരുന്നു. സംസ്കാരം നാളെ വീട്ടുവളപ്പില് നടക്കും.
കോട്ടയം ജില്ലയിലെ കങ്ങഴയ്ക്കടുത്തുള്ള ചുണ്ടമണ്ണില് സക്കറിയയുടെയും അന്നമ്മയുടെയും മകനായിട്ടായിരുന്നു ജനനം. പിന്നീട് വെള്ളത്തൂവലിലേക്ക് കുടിയേറുകയായിരുന്നു.പിതാവിന്റെ വഴി പിന്തുടര്ന്നാണ് സ്റ്റീഫന് ഇടതുപക്ഷ പ്രസ്ഥാനത്തിലേക്കെത്തിയത്. പാര്ട്ടി പിളര്ന്നപ്പോള് സിപിഐയില് നിലയുറപ്പിച്ചെങ്കിലും പിന്നീട് നക്സലൈറ്റ് പ്രസ്ഥാനത്തിലെത്തുകയായിരുന്നു.
തലശേരി പൊലീസ് സ്റ്റേഷന് ആക്രമണത്തിലെ പ്രധാനികളിലൊരാളാണ്. ഏറെക്കാലം ഒളിവില് കഴിഞ്ഞിരുന്ന സ്റ്റീഫനെ 1971ല് അറസ്റ്റുചെയ്തു. അന്ന് കൊലക്കേസ് ഉള്പ്പെടെ പതിനെട്ട് കേസുകളില് പ്രതിയായിരുന്നു സ്റ്റീഫന്. പിന്നാലെ ജയിലില്വച്ചുതന്നെ നക്സല് രാഷ്ട്രീയം ഉപേക്ഷിച്ചു.
'പാകതവരാത്ത ചെറുപ്പമായതിനാല് വിപ്ലവം അറിവില്ലായ്മയില് നിന്നുള്ള ആവേശമായിരുന്നു'എന്ന് അദ്ദേഹം തുറന്നു പറഞ്ഞിരുന്നു. ഇടക്കാലത്ത് സുവിശേഷ പ്രവര്ത്തനത്തിലേക്കും മാറി.
https://www.facebook.com/Malayalivartha
