മണിയന്‍പിള്ള രാജുവിന്റെ കാര്‍ അപകടത്തില്‍പ്പെട്ട സംഭവത്തില്‍ സത്യം വെളിപ്പെട്ടതില്‍ സന്തോഷമുണ്ടെന്ന് ജാമ്യം നേടി വീട്ടിലെത്തിയ മണിയന്‍പിള്ള രാജു. അപകടത്തിന്റെ സിസിടിവി ദൃശ്യങ്ങള്‍ പുറത്തുവന്നിരിക്കുകയാണ്. റോഡിലേക്ക് ഇറങ്ങിയ കാറിന്റെ മുന്‍വശത്തു ബൈക്ക് വന്നിടിക്കുന്നതാണ് ദൃശ്യത്തിലുള്ളത്. ട്രിവാന്‍ഡ്രം ക്ലബില്‍നിന്നു പുറത്തേക്കു വരാന്‍ ഇന്‍ഡിക്കേറ്റര്‍ ഇട്ട് രാജു കാര്‍ നിര്‍ത്തിയിരിക്കുന്നതു ദൃശ്യങ്ങളില്‍ കാണാം. ഒരു കാറും രണ്ട് ബൈക്കുകളും കടന്നു പോയതിനു ശേഷമാണ് രാജു കാര്‍ റോഡിലേക്ക് ഇറക്കിയത്.

എന്നാല്‍ കാര്‍ ദൂരെനിന്നു കണ്ടിരുന്നുവെന്നും അപ്പോള്‍ തന്നെ ഹോണ്‍ അടിച്ചിരുന്നുവെന്നും പരുക്കേറ്റ സൂരജ് പറഞ്ഞു. ഹോണ്‍ കേട്ട് കാര്‍ നിര്‍ത്തിയിരുന്നു. കയറിപ്പോകാന്‍ പറ്റുമെന്നാണ് കരുതിയത്. അടുത്തെത്തിയപ്പോള്‍ പെട്ടെന്ന് കാര്‍ മുന്നോട്ട് എടുത്ത് ഇടിക്കുകയായിരുന്നു. ഇതോടെ റോഡിലേക്കു തെറിച്ചുവീഴുകയായിരുന്നുവെന്നും സൂരജ് പറഞ്ഞു

അതേസമയം കാര്‍ വരുന്നത് കണ്ട് ഒരു സ്‌കൂട്ടര്‍ യാത്രികന്‍ നിര്‍ത്തുന്നതും ദൃശ്യത്തില്‍ കാണാം. കാര്‍ റോഡിന്റെ മുക്കാല്‍ ഭാഗത്തോളം വരുന്നഘട്ടത്തിലാണു വേഗത്തിലെത്തിയ ബൈക്ക് കാറിന്റെ മുന്‍വശത്ത് ഇടിക്കുന്നത്. കാറില്‍ ഇടിച്ചു ബൈക്ക് മറിഞ്ഞ് യുവാക്കള്‍ എതിര്‍ഭാഗത്തുള്ള റോഡിലേക്കാണു തെറിച്ചു വീണത്. ആ സമയത്ത് അതുവഴി വാഹനങ്ങള്‍ വരാതിരുന്നതിനാല്‍ വന്‍ ദുരന്തം ഒഴിവായി.

മണിയന്‍പിള്ള രാജുവിന്റെ കാറിന്റെ മുന്‍വശത്തെ ബമ്പര്‍ പൂര്‍ണമായും ഇളകിത്തെറിക്കുന്നതും ദൃശ്യത്തിലുണ്ട്. അപകടത്തിനു ശേഷം ഇളകിക്കിടക്കുന്ന ബമ്പറുമായി രാജു കാര്‍ നിര്‍ത്താതെ ഓടിച്ചു പോകുകയായിരുന്നു. ഈ സമയത്ത് യുവാക്കള്‍ പരുക്കേറ്റ് റോഡില്‍ കിടക്കുന്നതും ദൃശ്യത്തിലുണ്ട്. തുടര്‍ന്ന് ഓടിക്കൂടിയ നാട്ടുകാരാണ് ഇവരെ ആശുപത്രിയില്‍ എത്തിച്ചത്.

സിസിടിവി ദൃശ്യങ്ങള്‍ പുറത്തുവന്നതോടെ സത്യം വെളിപ്പെട്ടതില്‍ സന്തോഷമുണ്ടെന്ന് ജാമ്യം നേടി വീട്ടിലെത്തിയ മണിയന്‍പിള്ള രാജു പ്രതികരിച്ചു. ഒരു വര്‍ഷത്തിലേറെയായി ഒരു തുള്ളി മദ്യം കഴിച്ചിട്ടില്ല. അതുകൊണ്ടു തന്നെ വൈദ്യപരിശോധനയില്‍ ആശങ്കയൊന്നും ഉണ്ടായിരുന്നില്ല. രോഗാവസ്ഥയും ശാരീരികപ്രശ്‌നങ്ങളും കാരണമാണു നിര്‍ത്താതെ പോയത്. ശരിക്കും പേടിച്ചു പോയി. നിര്‍ത്തി പുറത്തിറങ്ങിയാല്‍ ആരെങ്കിലും പ്രശ്‌നമുണ്ടാക്കുമോ എന്നായിരുന്നു ഭയം. പിന്നീടതു മറ്റു രീതിയില്‍ ചിത്രീകരിക്കപ്പെടുമെന്നും ആശങ്കയുണ്ടായിരുന്നു. വിവരം രാത്രി തന്നെ പൊലീസിനെ അറിയിച്ചിരുന്നുവെന്നും രാജു പറഞ്ഞു.