യുവതി പ്രവേശനം ആവശ്യപ്പെട്ട ഹര്ജിക്കാരൊന്നും വിശ്വാസികളല്ലെന്ന് ജസ്റ്റിസ് നാഗരത്ന
ശബരിമല യുവതീപ്രവേശനം ആവശ്യപ്പെട്ട് ഹര്ജി നല്കിയവര് വിശ്വാസികളല്ലെന്ന് ജസ്റ്റിസ് നാഗരത്ന. സുപ്രീംകോടതിയില് യുവതീപ്രവേശനവുമായി ബന്ധപ്പെട്ട് വിധിയെ എതിര്ക്കുന്നവരുടെ വാദത്തിനിടെയാണ് ജസ്റ്റിസ് നാഗരത്ന ഇങ്ങനെ അഭിപ്രായപ്പെട്ടത്. പലവിധ അജണ്ടകളുമായി ചിലര് പൊതുതാല്പര്യഹര്ജി സമര്പ്പിക്കുന്നുണ്ടെന്ന് ചീഫ് ജസ്റ്റിസ് സൂര്യകാന്തും പറഞ്ഞു. ഒന്പതംഗ ഭരണഘടനാ ബെഞ്ച് ഇന്നത്തെ വാദം കേള്ക്കലും പൂര്ത്തിയാക്കി.
'യുവതീപ്രവേശനം ആവശ്യപ്പെട്ട ഹര്ജിക്കാരാരും വിശ്വാസികളല്ല. വിശ്വാസികളാരും യുവതീപ്രവേശനം ആവശ്യപ്പെട്ട് ഈ കോടതിയെ സമീപിച്ചിട്ടുമില്ല. ആരാണീ ഹര്ജിക്കാര്?' ജസ്റ്റിസ് നാഗരത്ന ചോദിച്ചു. യംഗ് ലോയേഴ്സ് അസോസിയേഷനാണ് അതെന്ന് കേന്ദ്ര സര്ക്കാരിനെ പ്രതിനിധീകരിക്കുന്ന സോളിസിറ്റര് ജനറല് തുഷാര് മേത്ത പറഞ്ഞു.
ശബരിമല ആചാരങ്ങള് സമൂഹത്തിന് ഹാനികരമല്ല എന്നും ഭരണഘടനാ മൂല്യങ്ങളെ ബാധിക്കില്ലെന്നും സോളിസിറ്റര് ജനറല് വാദിച്ചു. ശബരിമലയിലെത്തുന്ന ഭക്തരുടെ ആചാരമാണിതെന്ന് കേന്ദ്രം വാദിച്ചു. ഒരുകൂട്ടം ജനങ്ങളുടെ ധാര്മ്മികതയാണ് അവിടെ പാലിക്കുന്നത്. അവര് സ്വയം തീരുമാനിച്ചതാണതെന്നും ആര്ക്കും ദോഷം ചെയ്യുന്നില്ലെന്നും കേന്ദ്രം വ്യക്തമാക്കി.
നേരത്തെ സോളിസിറ്റര് ജനറല് വാദം തുടര്ച്ചയായി തടസപ്പെടുത്തുന്നെന്ന് മുതിര്ന്ന അഭിഭാഷകന് രാജീവ് ധവാന് കോടതിയില് പറഞ്ഞിരുന്നു. അദ്ദേഹവും സോളിസിറ്റര് ജനറലും തമ്മില് തര്ക്കവുമുണ്ടായിരുന്നു. പുനഃപരിശോധന ഹര്ജികളെ പിന്തുണയ്ക്കുന്നവരുടെ വാദം നാളെ അവസാനിക്കുകയാണെങ്കില് തങ്ങളുടെ അധ്വാനത്തിന് എന്താണ് സംഭവിക്കുക എന്ന ചോദ്യമാണ് ധവാന് ചോദിച്ചത്.
https://www.facebook.com/Malayalivartha
