വാല്‍പ്പാറയില്‍ ജീവന്‍ നഷ്ടമായത് മലപ്പുറത്തെ ജി എല്‍ പി സ്‌കൂളിലെ പ്രധാനാധ്യാപികയടക്കം 9 പേര്‍ക്ക്. മലപ്പുറം പാറമ്മല്‍ ജി എല്‍ പി സ്‌കൂളിലെ പ്രധാനാധ്യാപിക അജിതയടക്കം 9 പേരാണ് അപകടത്തില്‍ മരണപ്പെട്ടതെന്ന് അധികൃതര്‍ സ്ഥിരീകരിച്ചു. 7 സ്ത്രീകള്‍ക്കും ഒരു കുട്ടിക്കും ഒരു പുരുഷനുമാണ് ജീവന്‍ നഷ്ടമായത്. അജിത (54), റംല (52), സുഹറ (43), ആശ (41), മജീദ് (43), സാജിദ (45), ഷക്കാന (37) ,റുഖിയ (39), ഹിഷാം (12) എന്നിവരാണ് മരിച്ചതെന്ന് സ്ഥിരീകരിച്ചു. ഇതില്‍ സാജിദ സ്‌കൂളില്‍ ഭക്ഷണം ഉണ്ടാകുന്ന സ്ത്രീയാണ്. ഇവരുടെ മകനായ 11 വയസുള്ള ശഹദിന്‍ അപകടത്തില്‍ പരിക്കേറ്റ് ചികിത്സയിലാണ്. 8 പേര്‍ സംഭവസ്ഥലത്ത് വച്ചും ഒരാള്‍ ആശുപത്രിയില്‍ വച്ചുമാണ് മരണപ്പെട്ടത്. ഡ്രൈവര്‍ മുഹമ്മദ് ഫാസിത്തും ശഹദിനുമടക്കം 4 പേര്‍ ചികിത്സയിലാണ്. ഇതില്‍ 3 പേരെ പൊള്ളാച്ചി ആശുപത്രിയില്‍ നിന്ന് കൊയമ്പത്തൂര്‍ മെഡിക്കല്‍ കോളേജിലേക്ക് മാറ്റിയിട്ടുണ്ട്. 11 വയസുള്ള മസ്‌നി എന്ന പെണ്‍കുട്ടിയാണ് പൊള്ളാച്ചിയിലെ ജില്ലാ ആശുപത്രിയില്‍ ഉള്ളതെന്ന് സ്ഥിരീകരിച്ചിട്ടുണ്ട്.

മലപ്പുറത്തുനിന്ന് വിനോദയാത്രയ്‌ക്കെത്തിയ അധ്യാപക സംഘമാണ് അപകടത്തില്‍പ്പെട്ടത്. മലപ്പുറം പാറമ്മല്‍ ജി എല്‍ പി സ്‌കൂളിലെ അധ്യാപകരും ജീവനക്കാരും ചിലരുടെ കുടുംബാംഗങ്ങളുമാണ് വാഹനത്തിലുണ്ടായിരുന്നത്. അവധിക്കാലത്ത് അധ്യാപകര്‍ ഒന്നിച്ചുള്ള വിനോദയാത്രയാണ് ദുരന്തത്തില്‍ കലാശിച്ചത്. വളവില്‍ തെന്നിമാറി നിയന്ത്രണം വിട്ട വാന്‍ സംരക്ഷണ ഭിത്തി തകര്‍ത്ത് 300 അടി താഴ്ചയിലേക്ക് മറിയുകയായിരുന്നു. ഗഘ 11 അങ 7288 വാഹനമാണ് അപകടത്തില്‍പ്പെട്ടത്. മലപ്പുറം സ്വദേശിയുടെ ഉടമസ്ഥതയിലുള്ള ട്രാവലറാണ് ഇത്. വാഹനം ഓടിച്ചത് 21 കാരനായ കോട്ടക്കല്‍, ചുനൂര്‍ സ്വദേശിയായി മുഹമ്മദ് ഫാസിത്തായിരുന്നു. അതിരപ്പള്ളി വാഴച്ചാല്‍ മലക്കപ്പാറ സന്ദര്‍ശനത്തിന് ശേഷമാണ് സംഘം വാല്‍പ്പാറയില്‍ എത്തിയത്. ഇതിന് ശേഷം പൊള്ളാച്ചിയിലേക്ക് പോകവെയാണ് നടുക്കുന്ന അപകടമുണ്ടായത്. യാത്രക്കിടെ അധ്യാപകരെടുത്ത ചിത്രങ്ങള്‍ സ്‌കൂള്‍ ഗ്രൂപ്പുകളില്‍ ഇട്ടിരുന്നു. ഈ ചിത്രങ്ങള്‍ ഏവരെയും ഇപ്പോള്‍ നൊമ്പരപ്പെടുത്തുകയാണ്.