സ്ത്രീകളെ വിദേശത്തേക്ക് കടത്തി ലൈംഗികചൂഷണത്തിന് ഇരയാക്കിയിരുന്ന സംഘത്തിലെ മോഡല്‍ ഉള്‍പ്പെടെ രണ്ട് യുവതികളെ കൊച്ചി സിറ്റി പൊലീസ് അറസ്റ്റ് ചെയ്തു. സെക്‌സ് റാക്കറ്റിനും മനുഷ്യക്കടത്തിനും നേതൃത്വം നല്‍കിയ ഗുരുവായൂര്‍ സ്വദേശി ടോയ്‌സി സിന്ധു, മോഡലും തിരുവനന്തപുരം സ്വദേശിയുമായ അലീന എബ്രഹാം (23) എന്നിവരാണ് പിടിയിലായത്.

അലീനയെ മരട് പൊലീസ് സ്‌റ്റേഷന് സമീപമുള്ള ഫ്‌ലാറ്റില്‍ നിന്ന് ഇന്ന് വൈകിട്ടോടെയാണ് കസ്റ്റഡിയിലെടുത്തത്. മുംബയ് വിമാനത്താവളം വഴി വിദേശത്തേക്ക് കടക്കാന്‍ ശ്രമിച്ച ടോയ്‌സി സിന്ധുവിനെ കൊച്ചി സിറ്റി പൊലീസ് പുറപ്പെടുവിച്ച ലുക്കൗട്ട് സര്‍ക്കുലറിനെ തുടര്‍ന്ന് എമിഗ്രേഷന്‍ വിഭാഗം വിമാനത്താവളത്തില്‍ തടഞ്ഞുവച്ച് മുംബയ് സഫര്‍ പൊലീസിന് കൈമാറുകയായിരുന്നു. പൊന്നാനി സ്വദേശിയായ മറ്റൊരു യുവതിയും പിടിയിലാകുമെന്ന് പൊലീസ് അറിയിച്ചു.

മോഡലിംഗിന്റെ മറവില്‍ കൊച്ചി കേന്ദ്രീകരിച്ച് നടന്ന മനുഷ്യക്കടത്തിലും ലൈംഗികപീഡനത്തിലും കേരളത്തിന്റെ വിവിധ ഭാഗങ്ങളിലെ നിരവധി യുവതികള്‍ ഇരയായെന്നാണ് സൂചന. വീട്ടമ്മമാരും ഇതിലുള്‍പ്പെടും. മോഡലിംഗിന് പുറമെ, വിദേശത്ത് ഉയര്‍ന്ന ജോലികളും വാഗ്ദാനം ചെയ്തിരുന്നു. ദുബായില്‍ എത്തിച്ചശേഷം ഹോട്ടലുകളില്‍ കൊണ്ടുപോയി ശീതളപാനീയത്തില്‍ മയക്കുമരുന്ന് കലര്‍ത്തി നല്‍കി ബോധംകെടുത്തി പുരുഷന്‍മാര്‍ക്ക് കാഴ്ച വയ്ക്കും. നഗ്‌നദൃശ്യങ്ങള്‍ പകര്‍ത്തും. ദൃശ്യങ്ങള്‍ കാട്ടി ഭീഷണിപ്പെടുത്തി തുടര്‍ച്ചയായി പീഡനത്തിന് ഇരയാക്കുകയുമാണ് രീതി. വിസമ്മതിക്കുന്ന സ്ത്രീകളുടെ ഏറ്റവുമടുത്ത ബന്ധുക്കള്‍ക്ക് ചിത്രം അയച്ചുകൊടുക്കുമെന്നും സംഘം ഭീഷണിപ്പെടുത്തിയിരുന്നു.

സംഘത്തിന്റെ പിടിയില്‍ നിന്ന് രക്ഷപ്പെട്ട് കൊച്ചിയില്‍ തിരിച്ചെത്തിയ സ്ത്രീ നല്‍കിയ പരാതിയില്‍ മരട് പൊലീസ് കേസെടുത്തിരുന്നു. പിന്നാലെ മറ്റൊരു സ്ത്രീയും പരാതി നല്‍കിയിരുന്നു. അറസ്റ്റിലായ അലീനയ്‌ക്കെതിരെ വൈറ്റിലയിലെ ബാറില്‍ മദ്യപിച്ച് ബഹളമുണ്ടാക്കിയതിന് മരട് പൊലീസ് കേസെടുത്തിരുന്നു. അലീനയുടെ ഫ്‌ലാറ്റ് കേന്ദ്രീകരിച്ചായിരുന്നു ടോയ്‌സി സിന്ധുവിന്റെ പ്രവര്‍ത്തനം.