മഹാരാഷ്ട്രയില്‍ മുംബൈ-അഹമ്മദാബാദ് ദേശീയപാതയില്‍ ട്രാവലറും ട്രക്കും കൂട്ടിയിടിച്ച് 13 മരണം. ഇരുപതിലേറെപ്പേര്‍ക്ക് പരുക്ക്. മഹാരാഷ്ട്രയിലെ പാല്‍ഘറിലാണ് സംഭവം. വിവാഹസംഘം സഞ്ചരിച്ച ട്രാവലറിലേക്ക് ഒരു കണ്ടെയ്‌നര്‍ ട്രക്ക് ഇടിച്ചുകയറുകയായിരുന്നു.

വിവാഹസംഘം സഞ്ചരിച്ച ട്രാവലറില്‍ നാല്‍പ്പതിലേറെപ്പേരുണ്ടായിരുന്നെന്ന് പൊലീസ് പറഞ്ഞു. തിങ്കളാഴ്ച പുലര്‍ച്ചെ നാലു മണിയോടെയായിരുന്നു അപകടം. ഇടിയുടെ ആഘാതത്തില്‍ രണ്ടു വാഹനങ്ങളും മറിഞ്ഞ് ആളുകള്‍ ഉള്ളില്‍ കുടുങ്ങുകയായിരുന്നു. തുടര്‍ന്ന് നാട്ടുകാരും പൊലീസും ചേര്‍ന്നാണ് രക്ഷാപ്രവര്‍ത്തനം നടത്തിയത്.

പരുക്കേറ്റവര്‍ കാസയിലെ ഉപജില്ലാ ആശുപത്രിയില്‍ ചികില്‍സയിലാണ്. അപകടത്തെത്തുടര്‍ന്ന് ദേശീയപാതയില്‍ ഏറെനേരം ഗതാഗതം തടസപ്പെട്ടു. അമിതവേഗവും ശ്രദ്ധയില്ലാത്ത െ്രെഡവിങ്ങുമാണ് അപകടകാരണമെന്നാണ് പ്രാഥമിക നിഗമനമെന്ന് പൊലീസ് പറഞ്ഞു.