ഭര്‍ത്താവിന്റെ വീടിനു മുകളില്‍നിന്നു ചാടി ജീവനൊടുക്കിയ നിലയില്‍ കണ്ടെത്തിയ ഇരുപത്തഞ്ചുകാരിയെ കൊലപ്പെടുത്തിയതാണെന്ന ആരോപണവുമായി കുടുംബം. ഡല്‍ഹിയിലെ ഗ്രേറ്റര്‍ നോയിഡയില്‍ ഞായറാഴ്ച രാത്രിയാണ് സംഭവം. 17 മാസം മുന്‍പു വിവാഹിതയായ ദീപിക നാഗറിനെ ഭര്‍ത്താവ് റിതിക് തന്‍വാറും അയാളുെട മാതാപിതാക്കളും സ്ത്രീധനത്തിന്റെ പേരില്‍ ക്രൂരമായി പീഡിപ്പിച്ചിരുന്നെന്നും ദീപികയുടെ മൃതദേഹത്തില്‍ കത്തിയോ സ്‌ക്രൂഡ്രൈവറോ ഉപയോഗിച്ചു കുത്തിയതിന്റെ മുറിപ്പാടുണ്ടെന്നും പിതാവ് സഞ്ജയ് നാഗര്‍ ആരോപിച്ചു. സഞ്ജയ്‌യുടെ പരാതിയില്‍ റിതിക്കിനെയും പിതാവ് മനോജ് തര്‍വാറിനെയും പൊലീസ് അറസ്റ്റ് ചെയ്തിട്ടുണ്ട്. ദീപികയുടെ മരണം കൊലപാതകമാണോ എന്നു പോസ്റ്റ്‌മോര്‍ട്ടത്തിനു ശേഷമേ വ്യക്തമാകൂ എന്നും പൊലീസ് പറഞ്ഞു. ഭോപാലില്‍ ട്വിഷ ശര്‍മ എന്ന 33 കാരി ഭര്‍തൃഗൃഹത്തില്‍ കൊല്ലപ്പെട്ട് ഒരാഴ്ച കഴിയുംമുന്‍പാണ് മറ്റൊരു സ്ത്രീധന മരണം കൂടി വാര്‍ത്തയാകുന്നത്.

ഭര്‍ത്താവിന്റെ വീട്ടില്‍ ക്രൂരമായ ശാരീരിക, മാനസിക പീഡനങ്ങള്‍ക്ക് ഇരയാവുകയാണെന്ന് ദീപിക പറഞ്ഞിരുന്നെന്നു പിതാവ് സഞ്ജയ് പറഞ്ഞു. 'കഴിഞ്ഞ പത്തു മാസമായി അവള്‍ ഞങ്ങളോടു പരാതി പറയുന്നുണ്ടായിരുന്നു. എല്ലാം ശരിയാവുമെന്ന് ഞങ്ങള്‍ അവളെ ആശ്വസിപ്പിച്ചിരുന്നു. ഒരു കോടിയോളം രൂപ ചെലവഴിച്ചാണ് അവളുടെ വിവാഹം നടത്തിയത്. 11 ലക്ഷം രൂപയും 50 ലക്ഷം രൂപയുടെ സ്വര്‍ണവും ഒരു സ്‌കോര്‍പിയോ കാറും ഫര്‍ണിച്ചറും സ്ത്രീധനമായി നല്‍കിയിരുന്നു. 51 ലക്ഷം രൂപയും ഒരു ഫോര്‍ച്യൂണര്‍ എസ്‌യുവിയും കൂടി വേണമെന്നായിരുന്നു അവരുടെ ആവശ്യം. വിവാഹം കഴിഞ്ഞ് മൂന്നു നാലു മാസം കഴിഞ്ഞപ്പോള്‍ മുതല്‍ അത് ആവശ്യപ്പെട്ട് റിതികും മാതാപിതാക്കളും അവളെ ഉപദ്രവിക്കാന്‍ തുടങ്ങി. എന്നിട്ടും ഞങ്ങള്‍ പൊലീസില്‍ പരാതിപ്പെട്ടില്ല. പ്രശ്‌നം സംസാരിച്ചു പരിഹരിക്കാനാണു ശ്രമിച്ചത്.' – സഞ്ജയ് എന്‍ഡി ടിവിയോടു പറഞ്ഞു.

ഞായറാഴ്ച ദീപിക മാതാപിതാക്കളെ ഫോണില്‍ വിളിച്ചു കരഞ്ഞ ദീപിക, ഭര്‍ത്താവും അയാളുടെ മാതാപിതാക്കളും ക്രൂരമായി മര്‍ദിക്കുകയാണെന്നു പറഞ്ഞിരുന്നു. ഉടന്‍ ദീപികയുെട പിതാവും ബന്ധുക്കളും അവിടെയെത്തി സംസാരിച്ചു മടങ്ങി. അരമണിക്കൂര്‍ കഴിഞ്ഞ് ദീപിക വീടിനു മുകളില്‍നിന്നു വീണെന്നും ഗുരുതരമായി പരുക്കേറ്റെന്നും അവര്‍ക്ക് അറിയിപ്പു കിട്ടി. അതേസമയം, ദീപികയെ ഭര്‍ത്താവും വീട്ടുകാരും ചേര്‍ന്ന് കൊലപ്പെടുത്തിയ ശേഷം മുകള്‍നിലയില്‍നിന്നു താഴേക്ക് എറിഞ്ഞതാണെന്നും മൃതദേഹത്തില്‍ പരുക്കുകളുണ്ടെന്നുമാണ് കുടുംബത്തിന്റെ ആരോപണം. പൊലീസ് അന്വേഷണം തുടരുകയാണ്.