യുവാവിനെ കളമശേരി മുട്ടാര് പുഴയില് മരിച്ച നിലയില് കണ്ടെത്തി
കൊച്ചി കളമശ്ശേരിയിലെ മുട്ടാര് പുഴയില് യുവാവിനെ മരിച്ച നിലയില് കണ്ടെത്തി. തൃശൂര് ചൂണ്ടല് പയ്യൂര് സൂര്യഗ്രാമം മേക്കോട്ടില് എം.എ. ബിജു (45) ആണ് മരിച്ചത്. അപ്പോളോ ടയേഴ്സിലെ കരാര് തൊഴിലാളിയായിരുന്നു ബിജു. ഇടമുള പാലത്തിന് മുകളില് നിന്ന് ബിജുവിന്റെ ബൈക്കും മൊബൈല് ഫോണും ഉപേക്ഷിക്കപ്പെട്ട നിലയില് കണ്ടെത്തിയതിനെ തുടര്ന്നാണ് പൊലീസ് അന്വേഷണം ആരംഭിച്ചത്. തുടര്ന്ന് ഫയര്ഫോഴ്സിന്റെയും രക്ഷാപ്രവര്ത്തകരുടെയും നേതൃത്വത്തില് നടത്തിയ വ്യാപക തിരച്ചിലിനൊടുവില് മുട്ടാര് പുഴയില് നിന്ന് മൃതദേഹം കണ്ടെത്തുകയായിരുന്നു. അപ്പുക്കുട്ടന്ശാന്ത ദമ്പതികളുടെ മകനായ ബിജു അവിവാഹിതനായിരുന്നു.
ഇതേസമയം ബിജുവിനെ ഫോണില് കിട്ടാതിരുന്നതിനെ തുടര്ന്ന് ബന്ധുക്കളും തിരക്കി കളമശ്ശേരിയില് എത്തിയിരുന്നു. ഫയര്ഫോഴ്സ് സംഘം മൃതദേഹം കരയ്ക്കടുപ്പിച്ചു. ഇന്ക്വസ്റ്റ് പരിശോധനയില് ബിജുവിന്റെ കഴുത്തില് പ്ലാസ്റ്റിക് കയര് കുരുക്കിയ നിലയില് കണ്ടെത്തിയിട്ടുണ്ട്. ഈ കയറിന്റെ മറുഭാഗം പാലത്തിന്റെ കൈവരിയില് കെട്ടിയിട്ട നിലയിലായിരുന്നു. പാലത്തിന്റെ കൈവരിയില് തൂങ്ങിമരിക്കാന് ശ്രമിച്ചപ്പോള് കയര് പൊട്ടി പുഴയിലേക്ക് വീണതാകാമെന്നാണ് പോലീസിന്റെ പ്രാഥമിക നിഗമനം. കഴിഞ്ഞ മാസം 26 മുതല് ബിജു ജോലിക്ക് ഹാജരായിരുന്നില്ലെന്നാണ് കമ്പനിയില് നിന്നുള്ള വിവരം.
എന്നാല് കഴിഞ്ഞ ഞായറാഴ്ച രാത്രി വാടക വീട്ടില് വച്ച് ഒന്നിച്ച് ഐപിഎല് ക്രിക്കറ്റ് മത്സരം കണ്ടിരുന്നുവെന്ന് സഹപ്രവര്ത്തകരായ മറ്റ് കരാര് തൊഴിലാളികള് പൊലീസിന് മൊഴി നല്കിയിട്ടുണ്ട്. അതിന് ശേഷമാണ് ബിജുവിനെ കാണാതാകുന്നത്. മൃതദേഹം ഇന്ക്വസ്റ്റ് നടപടികള്ക്ക് ശേഷം പോസ്റ്റ്മോര്ട്ടത്തിനായി മാറ്റി. പോസ്റ്റ്മോര്ട്ടം റിപ്പോര്ട്ട് ലഭിച്ചതിന് ശേഷമേ മരണകാരണം സംബന്ധിച്ച് കൂടുതല് വ്യക്തത ലഭിക്കുകയുള്ളുവെന്ന് പൊലീസ് അറിയിച്ചു. ബന്ധുക്കളുടെയും സഹപ്രവര്ത്തകരുടെയും മൊഴികളും അന്വേഷണത്തിന്റെ ഭാഗമായി ശേഖരിക്കുന്നുണ്ട്.ബിജുവിന്റെ മരണവുമായി ബന്ധപ്പെട്ട കൂടുതല് വിവരങ്ങള്ക്കായി പൊലീസ് അന്വേഷണം തുടരുകയാണ്.
https://www.facebook.com/Malayalivartha
