ഒരു മലയാളി താരത്തിന്റെ ലോകകപ്പ് അരങ്ങേറ്റം കാണാൻ പ്രതീക്ഷയോടെ കേരളം. അമേരിക്കൻ ലോകകപ്പിൽ ഖത്തറിന് വേണ്ടി കണ്ണൂർ സ്വദേശി കളിക്കാനിറങ്ങും. കണ്ണൂർ തലശ്ശേരി സ്വദേശി തഹ്സീൻ മുഹമ്മദാണ് കളിക്കാനിറങ്ങുക. ലോകകപ്പ് സംഘത്തിൽ ഉൾപ്പെടുന്ന ആദ്യ മലയാളിയെന്ന റെക്കോർഡാണ് ഇതോടെ തഹ്സീൻ മുഹമ്മദ് സ്വന്തമാക്കിയിരിക്കുന്നത്.

കണ്ണൂർ സ്വദേശി ജംഷീദിന്റെയും ഷൈമയുടെയും മകനാണ് 19-കാരനായ തഹ്സീൻ മുഹമ്മദ്. ഖത്തർ ലീഗിൽ അൽ ദുഹൈൽ താരമാണ് അദ്ദേഹം.

തഹ്സീൻ മുഹമ്മദ് ജനിച്ചതും വളർന്നതുമെല്ലാം ഖത്തറിലാണ്. ചെറുപ്രായത്തിൽ തന്നെ ഖത്തർ യൂത്ത് ടീമുകളിൽ തഹ്‌സിൻ കളിച്ചിട്ടുണ്ടായിരുന്നു. ഖത്തർ ദേശീയ ടീമിനായി അണ്ടർ 16, അണ്ടർ 17, അണ്ടർ 19 വിഭാഗങ്ങളിലും തഹ്സിൻ മുഹമ്മദ് കളിച്ചിട്ടുണ്ട്.
1996ലാണ് കുടുംബം ഖത്തറിലേക്ക് കുടിയേറിയത്. അവിടെയാണ് തഹ്‌സിൻ ജനിച്ചതും തന്റെ ഫുട്‌ബോൾ യാത്രയ്ക്ക് തുടക്കം കുറിച്ചതും. ദോഹയിൽ വളർന്ന തഹ്‌സിന് ആ രാജ്യവുമായി എന്നും ആഴത്തിലുള്ളൊരു ആത്മബന്ധമുണ്ട്.

ഖത്തർ പൗരത്വമുള്ള തഹ്‌സിൻ ഏറെ അഭിമാനത്തോടെയാണ് ഖത്തറിനെ തന്റെ സ്വന്തം രാജ്യമെന്ന് വിശേഷിപ്പിക്കുന്നത്. ഖത്തറിലെ മികച്ച കളിക്കാരെ വാർത്തെടുക്കുന്നതിൽ പേരുകേട്ട പ്രശസ്തമായ 'ആസ്പയർ ഫുട്‌ബോൾ അക്കാദമി'യിലാണ് തഹ്‌സിൻ പരിശീലനം നേടിയത്.