ഗൂഡല്ലൂരിൽ കാട്ടാനക്കലിയിൽ ഒരാൾക്കൂടി മരിച്ചു. ആക്രമണത്തിൽ പരിക്കേറ്റ് ചികിത്സയിലായിരുന്ന ബിദർക്കാട് ഓടോടംവയൽ സ്വദേശി സുകുമാരൻ(52) ആണ് മരിച്ചത്. കോഴിക്കോട് സ്വകാര്യ ആശുപത്രിയിൽ ചികിത്സയിൽ കഴിയുകയായിരുന്നു.

ബിദർക്കാട് ടൗണിൽ നിന്ന് സാധനങ്ങൾ വാങ്ങി വീട്ടിലേക്ക് മടങ്ങുകയായിരുന്ന സുകുമാരനെ കഴിഞ്ഞദിവസം രാത്രി എട്ടുമണിക്കാണ് കൈവട്ട സ്കൂൾ ജംഗ്ഷൻ റോഡിൽ വെച്ച് കാട്ടാന ആക്രമിച്ചത്.

ഗുരുതര പരിക്കേറ്റ ഇയാളെ സുൽത്താൻ ബത്തേരിയിലെ സ്വകാര്യ ആശുപത്രിയിലും അവിടെനിന്ന് കോഴിക്കോട് ആശുപത്രിയിലേക്കും കൊണ്ടുപോയി ചികിത്സിച്ചെങ്കിലും ബുധനാഴ്ച രാത്രി മരണത്തിന് കീഴടങ്ങി. ഭാര്യ: തമിഴ്സെൽവി. മക്കൾ: സുമൻ, കൗശല്യ.

അതേസമയം ഇതേ റേഞ്ചിൽപ്പെട്ട പാക്കണയിൽ പെരുന്നാൾ തലേന്ന് 12കാരൻ കാട്ടാനയുടെ ആക്രമണത്തിൽ കൊല്ലപ്പെട്ടിരുന്നു. മുടി വെട്ടാനായി പോയി വീട്ടിലേക്ക് മടങ്ങവേയാണ് കഴിഞ്ഞ ബുധനാഴ്ച രാത്രി 7. 30നാണ് മിസ്ബഹ് എന്ന വിദ്യാർഥി കൊല്ലപ്പെട്ടത്.