കണ്ണൂരിൽ ചെറുകുന്ന് കതിരുവെക്കും തറക്ക് സമീപം ചെങ്കൽ ലോറിയും ബൈക്കും കൂട്ടിയിടിച്ച് പയ്യന്നൂർ കാളീശ്വരം സ്വദേശിയായ പൂജാരി മരിച്ചു. സംഭവത്തിൽ ചെങ്കൽ ലോറി ഡ്രൈവർക്കെതിരെ കണ്ണപുരം കേസെടുത്ത് പൊലീസ്. ചെറുകുന്ന് അന്നപൂർണ്ണേശ്വരി ക്ഷേത്രത്തിലെ കീഴ്ശാന്തി കാങ്കോൽ കാളീശ്വരം കുഞ്ഞിപ്പാറയിലെ പാലക്കുന്നില്ലത്ത് പത്മനാഭൻ നമ്പൂതിരി (53) യാണ് മരിച്ചത്.

വ്യഴാഴ്ച പുലർച്ചെ 4.30നാണ് അപകടം നടന്നത്. അപകടം വരുത്തിയ ചെങ്കൽ ലോറി ഡ്രൈവർക്കെതിരെ മനപൂർവ്വമല്ലാത്ത നരഹത്യയ്ക്ക് കേസെടുത്ത പൊലീസ് അറസ്റ്റ് രേഖപ്പെടുത്തുകയും ചെയ്തു. പാലക്കാട് പോകാനായി കണ്ണൂർ റെയിൽവേ സ്റ്റേഷനിലേക്ക് ചെറുകുന്നിൽ നിന്നു ബൈക്കിൽ പോകവെയാണ് അപകടം സംഭവിച്ചത്. ഉടൻ ആശുപത്രിയിലെത്തിച്ചുവെങ്കിലും ജീവൻ രക്ഷിക്കാൻ കഴിഞ്ഞില്ല. പത്ത് വർഷത്തോളമായി ചെറുകുന്ന് ക്ഷേത്രത്തിൽ കീഴ്ശാന്തിയായി പ്രവർത്തിച്ചു വരികയായിരുന്നു അദ്ദേഹം.

കണ്ണപുരം പോലീസ് മൃതദേഹം ഇൻക്വസ്റ്റ് നടത്തി. കാളീശ്വരത്തെ നാരായണൻ നമ്പൂതിരിയുടെയും സരസ്വതി അന്തർജനത്തിൻ്റെയും മകനാണ്. ഭാര്യ: ഷജിന. കുന്നമംഗലത്തില്ലം വടകര. മക്കൾ: ശ്രീരാഗ് (മർച്ചൻ്റ് നേവി ), ശ്രീനന്ദ (വിദ്യാർഥിനി )