സ്ത്രീകളുടെ സ്വകാര്യ ദൃശ്യങ്ങൾ മൊബൈൽ ഫോണിൽ സൂക്ഷിച്ചിരുന്നുവെന്ന കണ്ടെത്തലിന് പിന്നാലെ ഡോക്ടർ ജോൺസൺ കെ. വർഗീസിനെതിരെ കൂടുതൽ ഗുരുതരമായ വിവരങ്ങൾ പുറത്ത്. ലൈംഗികാതിക്രമക്കേസിൽ പ്രതിയായ ഡോക്ടർക്കെതിരെ ഇപ്പോൾ ഉയരുന്നത് മുൻപ് ജോലി ചെയ്തിരുന്ന ആശുപത്രികളിലെ മോശം പെരുമാറ്റത്തെക്കുറിച്ചുള്ള പരാതികൾ കൂടിയാണ്. രണ്ട് വർഷം മുൻപ് പത്തനംതിട്ടയിലെ സ്വകാര്യ ആശുപത്രിയിൽ ജോലി ചെയ്തിരുന്ന കാലത്തും വനിതാ ജീവനക്കാരിയോട് മോശമായി പെരുമാറിയതിന് ഡോക്ടർക്ക് താക്കീത് നൽകിയിരുന്നുവെന്നാണ് അന്വേഷണത്തിൽ പുറത്തുവന്ന വിവരം. ഇപ്പോൾ കേസിൽ ഉൾപ്പെട്ടതോടെ അവസാനമായി ജോലി ചെയ്തിരുന്ന കൊച്ചിയിലെ ആശുപത്രിയിൽനിന്നും ഇയാളെ പുറത്താക്കിയതായാണ് റിപ്പോർട്ട്. ഒരാളുടെ പരാതിയിൽ തുടങ്ങിയ അന്വേഷണം, ഡോക്ടറുടെ മുൻകാല ജോലിസ്ഥലങ്ങളിലേക്കും നീളുമ്പോൾ പുറത്തുവരുന്നത് ഗൗരവമേറിയ വിവരങ്ങളാണ്.

ഡോക്ടറുടെ മൊബൈൽ ഫോൺ പരിശോധിച്ചതാണ് അന്വേഷണത്തിൽ നിർണായകമായ മറ്റൊരു വഴിത്തിരിവായത്. ഫോണിൽ നിരവധി സ്ത്രീകളുടെ സ്വകാര്യവും നഗ്നവുമായ ദൃശ്യങ്ങൾ കണ്ടെത്തിയെന്നാണ് അന്വേഷണവുമായി ബന്ധപ്പെട്ട റിപ്പോർട്ടുകൾ. പന്ത്രണ്ടോളം സ്ത്രീകളുമായുള്ള സ്വകാര്യ ദൃശ്യങ്ങൾ ഫോണിലുണ്ടായിരുന്നതായി നേരത്തെ പുറത്തുവന്നിരുന്നു. ഈ ദൃശ്യങ്ങൾ എങ്ങനെയാണ് പകർത്തിയത്? ബന്ധപ്പെട്ട സ്ത്രീകളുടെ അറിവോടെയാണോ ഇവ സൂക്ഷിച്ചത്? ദൃശ്യങ്ങൾ ഉപയോഗിച്ച് ആരെയെങ്കിലും ഭീഷണിപ്പെടുത്തുകയോ ബ്ലാക്ക്മെയിൽ ചെയ്യുകയോ ചെയ്തിട്ടുണ്ടോ? തുടങ്ങിയ കാര്യങ്ങളും അന്വേഷണസംഘം പരിശോധിക്കുന്നുണ്ട്. എന്നാൽ ദൃശ്യങ്ങൾ കണ്ടെത്തിയതുകൊണ്ടുമാത്രം മറ്റ് സ്ത്രീകൾക്കെതിരായ കുറ്റകൃത്യങ്ങൾ തെളിഞ്ഞതായി പറയാനാകില്ല. ഇതുമായി ബന്ധപ്പെട്ട് കൂടുതൽ പരാതികൾ ലഭിച്ചിട്ടുണ്ടോ എന്നതും അന്വേഷണത്തിൽ നിർണായകമാണ്.

അതേസമയം, ഈ കേസിലേക്ക് നയിച്ച സംഭവങ്ങൾ തുടങ്ങുന്നത് കൊച്ചിയിലെ പൊന്നുരുന്നിയിലെ ഒരു ഫ്ലാറ്റിൽനിന്നാണ്. തനിക്കു നേരെ ഒരു സംഘം ആളുകൾ ആക്രമണം നടത്തിയെന്നും മൊബൈൽ ഫോണുകളടക്കം വിലപിടിപ്പുള്ള വസ്തുക്കൾ കവർന്നെന്നുമായിരുന്നു ഡോക്ടർ ജോൺസൺ കടവന്ത്ര പൊലീസിൽ നൽകിയ പരാതി. ചികിത്സ ആവശ്യമുള്ള ഒരാളെ കാണാനെന്ന പേരിൽ ഫ്ലാറ്റിലേക്ക് വിളിച്ചുവരുത്തിയ ശേഷം പന്ത്രണ്ടോളം പേർ ചേർന്ന് തന്നെ തടഞ്ഞുവെച്ച് മർദിച്ചെന്നാണ് ഡോക്ടറുടെ ആരോപണം. രണ്ടുമൊബൈൽ ഫോണുകൾ ഉൾപ്പെടെ ഏകദേശം 3.25 ലക്ഷം രൂപ വിലമതിക്കുന്ന വസ്തുക്കൾ നഷ്ടപ്പെട്ടതായും പരാതിയിലുണ്ടായിരുന്നു. ഈ കേസിൽ നടി , നടൻ ബിബിൻ പെരുമ്പള്ളി, കെ.ബി. വിഷ്ണു എന്നിവരടക്കം മൂന്നുപേർ അറസ്റ്റിലായി.

എന്നാൽ ഇതിന് പിന്നാലെയാണ് ഡോക്ടർക്കെതിരെ ഗുരുതരമായ മറ്റൊരു പരാതി ഉയർന്നത്. നടിയുടെ അടുത്ത ബന്ധുവായ യുവതിയാണ് ഇൻഫോപാർക്ക് പൊലീസിൽ ലൈംഗികാതിക്രമ പരാതി നൽകിയത്. ഒക്ടോബർ മാസത്തിൽ കൊച്ചിയിലെ ഒരു ഹോട്ടലിൽവെച്ച് ഡോക്ടർ ലൈംഗികമായി പീഡിപ്പിച്ചുവെന്നാണ് യുവതിയുടെ ആരോപണം. മദ്യപിക്കാൻ നൽകിയ ശേഷം പീഡിപ്പിച്ചുവെന്നും സ്വകാര്യ ദൃശ്യങ്ങൾ പകർത്തിയിട്ടുണ്ടാകുമെന്ന ഭയം കാരണം പരാതി നൽകാൻ വൈകിയെന്നുമാണ് പരാതിക്കാരി അന്വേഷണസംഘത്തോട് പറഞ്ഞതായുള്ള വിവരം. ഇതിന്റെ അടിസ്ഥാനത്തിലാണ് ഡോക്ടർക്കെതിരെ ബലാത്സംഗക്കേസ് രജിസ്റ്റർ ചെയ്തത്.

ഇതിനിടെ, ഡോക്ടർക്കെതിരായ പരാതി ഒതുക്കിത്തീർക്കാൻ ഒരു കോടി രൂപ വാഗ്ദാനം ചെയ്തിരുന്നുവെന്നാണ് അറസ്റ്റിലായ നടിയുടെ മൊഴിയെന്ന വിവരവും പുറത്തുവന്നിരുന്നു. എന്നാൽ ഡോക്ടറുടെ വാദം മറ്റൊന്നാണ്. തനിക്കെതിരായ പീഡനപരാതി വ്യാജമാണെന്നും തന്നെ ആക്രമിച്ച് മൂന്ന് കോടി രൂപ ആവശ്യപ്പെട്ടെന്നുമാണ് ഡോക്ടറുടെ ആരോപണം. രണ്ട് കേസുകളിലും ഉയർന്നിരിക്കുന്ന ആരോപണങ്ങൾ പൊലീസ് വിശദമായി അന്വേഷിച്ചുവരികയാണ്.

നിലവിൽ ഡോക്ടർ ഒളിവിലാണ്. ഇയാൾക്കെതിരെ ലുക്ക്ഔട്ട് നോട്ടിസും പുറപ്പെടുവിച്ചിട്ടുണ്ട്. രാജ്യം വിട്ടിട്ടില്ലെന്നാണ് പൊലീസിന്റെ ഇപ്പോഴത്തെ വിലയിരുത്തൽ. മുൻകൂർ ജാമ്യം തേടി ഡോക്ടർ കോടതിയെ സമീപിച്ചിട്ടുമുണ്ട്. അതേസമയം, മുൻകാല ആശുപത്രികളിലെ പരാതികളും മൊബൈലിൽനിന്ന് കണ്ടെത്തിയ സ്വകാര്യ ദൃശ്യങ്ങളും അന്വേഷണത്തിൽ നിർണായകമാകുമെന്നാണ് വിലയിരുത്തൽ.

ഒരു ഡോക്ടർക്കെതിരായ ലൈംഗികാതിക്രമ പരാതിയിൽ ഒതുങ്ങിനിൽക്കാതെ, മുൻകാല ജോലിസ്ഥലങ്ങളിലെ പെരുമാറ്റവും നിരവധി സ്ത്രീകളുടെ സ്വകാര്യ ദൃശ്യങ്ങളുടെ ഉറവിടവും അന്വേഷിക്കേണ്ട സാഹചര്യത്തിലേക്കാണ് ഇപ്പോൾ കേസ് നീങ്ങുന്നത്. ഈ ദൃശ്യങ്ങൾക്ക് പിന്നിൽ എന്താണ്? കൂടുതൽ സ്ത്രീകൾ പരാതിയുമായി മുന്നോട്ടുവരുമോ? ഒളിവിലുള്ള ഡോക്ടറെ പിടികൂടുന്നതോടെ അന്വേഷണത്തിൽ കൂടുതൽ വിവരങ്ങൾ പുറത്തുവരുമെന്നാണ് പ്രതീക്ഷ.