41 ദിവസം നീളുന്ന മണ്ഡലകാല തീർഥാടനത്തിനായി തിങ്കളാഴ്ച ശബരിമലയിൽ നട തുറക്കും. വൈകുന്നേരം അഞ്ചിന് തന്ത്രി കണ്ഠരര് ബ്രഹ്മദത്തന്റെ സാന്നിധ്യത്തിൽ മേൽശാന്തി ഇ.ഡി. പ്രസാദ് നമ്പൂതിരി നടതുറന്ന് ശ്രീലകത്ത് ദീപം തെളിക്കും.

തുടർന്ന് മേൽശാന്തി പതിനെട്ടാംപടി ഇറങ്ങി ഹോമകുണ്ഡത്തിൽ അഗ്നി തെളിക്കും. ഈ സമയം ഇരുമുടിക്കെട്ടുമായി എത്തി പതിനെട്ടാംപടിക്ക് താഴെ കാത്തുനിൽക്കുന്ന നിയുക്ത മേൽശാന്തി സുബ്രഹ്മണ്യൻ ശങ്കരൻ നമ്പൂതിരിയെയും മാളികപ്പുറം മേൽശാന്തി എ. ദാമോദരൻ നമ്പൂതിരിയെയും നിലവിലെ മേൽശാന്തി സോപാനത്തേക്ക് ആനയിക്കും. 6.30ഓടെ സന്നിധാനത്തും പിന്നാലെ മാളികപ്പുറത്തും അവരോധ ചടങ്ങ് നടക്കും.

17ന് വൃശ്ചിക പുലരിയിൽ മൂന്നിന് പുതിയ മേൽശാന്തിമാരാണ് സന്നിധാനം, മാളികപ്പുറം നടകൾ തുറക്കുക. മണ്ഡലകാലത്ത് ദർശനം പ്രതിദിനം 80,000 പേർക്ക് എന്നാണ് നിജപ്പെടുത്തിയിരിക്കുന്നത്. ഇതിൽ 66000 പേർക്ക് വെർച്വൽ ക്യൂ ബുക്കിങ് വഴി എത്താം.

മുഖ്യമന്ത്രിയുടെ അധ്യക്ഷതയിൽ തിരുവനന്തപുരത്തും പമ്പയിലും യോഗം ചേർന്ന് കൈക്കൊണ്ട തീരുമാനങ്ങളുടെ അടിസ്ഥാനത്തിൽ വിവിധ വകുപ്പുകളുടെ മുന്നൊരുക്ക പ്രവർത്തനങ്ങൾ ഏറക്കുറെ പൂർത്തീകരിച്ചിട്ടുണ്ട്.

പൊതുമരാമത്ത് ചാലക്കയം-പമ്പ റോഡിൻറെ നവീകരണം അടക്കം റെക്കോഡ് വേഗത്തിൽ പൂർത്തീകരിച്ചു. ആരോഗ്യ വകുപ്പ് പമ്പയിലും സന്നിധാനത്തും ആശുപത്രികൾ തുറന്നുകഴിഞ്ഞു. അഞ്ച് ഫേസായി പൊലീസിനെ വിന്യസിക്കുന്നതിനുള്ള പ്രവർത്തനങ്ങൾ ആഭ്യന്തര വകുപ്പും പൂർത്തിയാക്കി കഴിഞ്ഞു.