മന്ത്രിമാരുടെയും ചീഫ് സെക്രട്ടറിയുടെയും ഔദ്യോഗിക യാത്രകള്‍ക്കായി 24 പുതിയ ടൊയോട്ട ഇന്നോവ ഹൈക്രോസ് കാറുകള്‍ വാങ്ങാന്‍ സര്‍ക്കാര്‍ അനുമതി നല്‍കി. ഇതിനായി 9.60 കോടി രൂപയാണ് ചെലവഴിക്കുന്നത്. ടൊയോട്ടയുടെ ഏറ്റവും ഉയര്‍ന്ന മോഡലായ ഇന്നോവ ഹൈക്രോസ് ZX(O) സ്‌ട്രോങ് ഹൈബ്രിഡ് വാഹനങ്ങളാണ് വാങ്ങുന്നത്.

അനുവദിച്ച 24 വാഹനങ്ങളില്‍ 22 എണ്ണം മന്ത്രിമാര്‍ക്കും ചീഫ് സെക്രട്ടറിക്കുമായാണ് നല്‍കുക. ശേഷിക്കുന്ന രണ്ട് വാഹനങ്ങള്‍ സംസ്ഥാനത്തെത്തുന്ന വിശിഷ്ട വ്യക്തികള്‍, വിദേശ പ്രതിനിധികള്‍, മറ്റ് പ്രമുഖ അതിഥികള്‍ എന്നിവരുടെ യാത്രകള്‍ക്കും പ്രോട്ടോക്കോള്‍ ആവശ്യങ്ങള്‍ക്കുമായി ഉപയോഗിക്കും. വാഹനങ്ങള്‍ വാങ്ങുന്നതിനുള്ള ചുമതല വിനോദസഞ്ചാര വകുപ്പിനാണ് നല്‍കിയിരിക്കുന്നത്.

നിലവില്‍ മന്ത്രിമാരില്‍ ഭൂരിഭാഗവും ഔദ്യോഗിക ആവശ്യങ്ങള്‍ക്കായി ഉപയോഗിക്കുന്ന വാഹനങ്ങള്‍ കാലപ്പഴക്കം ചെന്നതും ദീര്‍ഘകാലത്തെ ഉപയോഗം കാരണം യന്ത്രസാമഗ്രികളുടെ പ്രവര്‍ത്തനക്ഷമത കുറഞ്ഞതുമാണെന്നാണ് സര്‍ക്കാര്‍ ഉത്തരവില്‍ വ്യക്തമാക്കുന്നത്. വാഹനങ്ങള്‍ക്ക് ഇടയ്ക്കിടെ അറ്റകുറ്റപ്പണികളും പരിപാലനവും ആവശ്യമായി വരുന്നതിനാല്‍ ചെലവ് വര്‍ധിക്കുന്നതായും ഔദ്യോഗിക ആവശ്യങ്ങള്‍ക്കുള്ള വാഹനങ്ങളുടെ ലഭ്യതയെയും വിശ്വാസ്യതയെയും ഇത് ബാധിക്കുന്നതായും ഉത്തരവില്‍ ചൂണ്ടിക്കാട്ടുന്നു.ഔദ്യോഗിക പരിപാടികള്‍, യോഗങ്ങള്‍, മണ്ഡല സന്ദര്‍ശനങ്ങള്‍, സര്‍ക്കാര്‍ ചടങ്ങുകള്‍ എന്നിവയില്‍ പങ്കെടുക്കുന്നതിന് മന്ത്രിമാര്‍ക്ക് മികച്ച പ്രവര്‍ത്തനക്ഷമതയുള്ള വാഹനങ്ങള്‍ ലഭ്യമാക്കേണ്ടതുണ്ടെന്നും നിലവിലുള്ള വാഹനങ്ങള്‍ കാലാനുസൃതമായി മാറ്റിസ്ഥാപിക്കേണ്ടതുണ്ടെന്നും സര്‍ക്കാര്‍ വിശദീകരിക്കുന്നു.

അതേസമയം, സംസ്ഥാനത്തേക്ക് എത്തുന്ന വിശിഷ്ട വ്യക്തികള്‍, വിദേശ പ്രതിനിധികള്‍, മറ്റ് പ്രമുഖ അതിഥികള്‍ എന്നിവരുടെ സന്ദര്‍ശനങ്ങളുമായി ബന്ധപ്പെട്ട പ്രോട്ടോക്കോള്‍ ആവശ്യങ്ങള്‍ നിറവേറ്റാന്‍ നിലവിലുള്ള വാഹനങ്ങള്‍ അപര്യാപ്തമാണെന്നും സര്‍ക്കാര്‍ ചൂണ്ടിക്കാട്ടുന്നു. സംസ്ഥാനതല പരിപാടികള്‍, സമ്മേളനങ്ങള്‍, ഔദ്യോഗിക ചടങ്ങുകള്‍ എന്നിവയ്ക്കും കൂടുതല്‍ വാഹനങ്ങള്‍ ആവശ്യമാണ്.

സാമ്പത്തിക പ്രതിസന്ധിയുടെ പശ്ചാത്തലത്തില്‍ പുതിയ വാഹനങ്ങള്‍ വാങ്ങുന്നില്ല എന്ന നിലപാട് മുഖ്യമന്ത്രി വി. ഡി. സതീശന്‍ അധികാരമേറ്റ സമയത്ത് സ്വീകരിച്ചിരുന്നു. എന്നാല്‍, ഇപ്പോള്‍ ആ നിലപാട് മാറ്റിയിരിക്കുകയാണ്.