14 പേരുടെ ദാരുണമരണത്തിനിടയാക്കിയ ഫുജൈറ വാഹനാപകടത്തിൽ സമഗ്ര അന്വേഷണം പ്രഖ്യാപിച്ച് യുഎഇ പബ്ലിക് പ്രോസിക്യൂഷൻ. അപകടത്തിന് കാരണമായ ട്രക്കിന്റെ ഡ്രൈവറെ ചോദ്യം ചെയ്ത ശേഷം ചികിത്സയിൽ കഴിയുന്ന ആശുപത്രിയിൽ വെച്ചുതന്നെ റിമാൻഡ് ചെയ്തു. ഇയാളുടെ പാസ്പോർട്ട്, ഡ്രൈവിങ് ലൈസൻസ് ഉൾപ്പെടെയുള്ള പ്രധാന രേഖകൾ അന്വേഷണ സംഘം പിടിച്ചെടുത്തിട്ടുണ്ട്.

കഴിഞ്ഞ ദിവസങ്ങളിലായി ഫുജൈറയിലെ ശൈഖ് ഖലീഫ റോഡിൽ തുടർച്ചയായ രണ്ട് വലിയ വാഹനാപകടങ്ങളാണ് ഉണ്ടായത്. റോഡരികിൽ നിർത്തിയിട്ടിരുന്ന ട്രക്കിൽ മറ്റൊരു വാഹനം ഇടിച്ചായിരുന്നു ആദ്യത്തെ അപകടം. ഇതിന് പിന്നാലെ ഷിപ്പിങ് കണ്ടെയ്നറുമായി വന്ന ട്രക്ക് നിയന്ത്രണം വിട്ട് മറ്റു വാഹനങ്ങളിൽ ഇടിച്ച് മറിഞ്ഞാണ് രണ്ടാമത്തെ വൻ ദുരന്തമുണ്ടായത്.

രണ്ടാമത്തെ അപകടത്തിന് ഇടയാക്കിയ ട്രക്ക് ഡ്രൈവർക്കെതിരെയാണ് പ്രോസിക്യൂഷൻ കർശന നടപടി സ്വീകരിച്ചിരിക്കുന്നത്. അപകടത്തിൽപ്പെട്ട് തകർന്ന മുഴുവൻ വാഹനങ്ങളും സാങ്കേതിക വിദഗ്ധരുടെ നേതൃത്വത്തിൽ വിശദമായി പരിശോധിക്കും. രണ്ട് അപകടങ്ങളുടെയും കൃത്യമായ കാരണങ്ങൾ കണ്ടെത്തുന്നതിനായി സമഗ്രമായ പരിശോധനാ റിപ്പോർട്ട് തയ്യാറാക്കാൻ പ്രോസിക്യൂഷൻ നിർദ്ദേശം നൽകിയിട്ടുണ്ട്.

അതേസമയം, അപകടത്തിൽ മരിച്ചവരുടെ കൃത്യമായ മരണകാരണം കണ്ടെത്തുന്നതിനായി വിശദമായ ഫോറൻസിക് പരിശോധന നടത്തും. മൃതദേഹങ്ങൾ തിരിച്ചറിയുന്നതിനായി ഡി.എൻ.എ (DNA) പരിശോധനയും ആരംഭിച്ചിട്ടുണ്ട്. ഇതിന്റെ ഭാഗമായി മരിച്ചവരുടെ ബന്ധുക്കളിൽ നിന്നും സാമ്പിളുകൾ ശേഖരിക്കുമെന്നും യുഎഇ പബ്ലിക് പ്രോസിക്യൂഷൻ ഔദ്യോഗികമായി അറിയിച്ചു.