എന്എസ്എസ് നേതൃത്വത്തിനെതിരെ പരോക്ഷ വിമര്ശനവുമായി കെബി ഗണേശ് കുമാര്
എന്.എസ്.എസ് നേതൃത്വത്തിനും ജനറല് സെക്രട്ടറിക്കും എതിരെ രൂക്ഷ വിമര്ശനവുമായി കെ.ബി. ഗണേശ് കുമാര്. തിരുവനന്തപുരം മന്നം ക്ലബ്ബില് നടന്ന പുസ്തക പ്രകാശന ചടങ്ങിലാണ് അദ്ദേഹം സംഘടനയ്ക്കെതിരെ തുറന്നടിച്ചത്. എന്.എസ്.എസ് നിലവില് ചില 'ഇത്തിള്ക്കണ്ണികളുടെ' പിടിയിലാണെന്നും സംഘടനയില് ജനാധിപത്യം നഷ്ടപ്പെട്ടിട്ടുണ്ടെന്നും അദ്ദേഹം കുറ്റപ്പെടുത്തി.
മന്നത്ത് പത്മനാഭന് ഇരുന്ന കസേരയിലിരിക്കുന്നവര് ആ പദവിയുടെ ഗൗരവം ഉള്ക്കൊണ്ട് പ്രവര്ത്തിക്കണമെന്ന് അദ്ദേഹം ഓര്മ്മിപ്പിച്ചു. കനകസിംഹാസനത്തില് ഏത് ശുനകനും കയറിയിരിക്കാം എന്ന് തോന്നിക്കുന്ന തരത്തില് പെരുമാറരുത്. തങ്ങള് ഇരിക്കുന്നത് ഏത് സ്ഥാനത്താണെന്ന് ഓര്ക്കണമെന്ന് വ്യക്തമാക്കി ജനറല് സെക്രട്ടറി ജി. സുകുമാരന് നായരെ പരോക്ഷമായി ലക്ഷ്യമിട്ടാണ് ഗണേശ് കുമാര് പരാമര്ശം നടത്തിയത്.
എന്.എസ്.എസില് നടക്കുന്ന ഏറ്റവും വലിയ അഴിമതി സ്വജനപക്ഷപാതമാണെന്ന് ഗണേശ് കുമാര് ആരോപിച്ചു. സംഘടനയിലെ ഒരാള് തന്റെ കുടുംബത്തില് നിന്ന് മാത്രം 43 പേരെ ജോലിക്ക് കയറ്റിയിട്ടുണ്ടെന്നും അദ്ദേഹം ആരോപിച്ചു. സംഘടനയ്ക്ക് സാമ്പത്തിക ശേഷിയുണ്ടായിട്ടും എന്തുകൊണ്ട് മെഡിക്കല് കോളേജോ ഐ.ടി പാര്ക്കോ തുടങ്ങിയില്ലെന്ന് അദ്ദേഹം ചോദിച്ചു.
'മെഡിക്കല് കോളേജിലെ തൂപ്പുജോലിക്ക് പോലും യോഗ്യതയുള്ളവര് ഈ വ്യക്തിയുടെ കുടുംബത്തില് ഇല്ലാത്തതുകൊണ്ടാണ് മെഡിക്കല് കോളേജ് വരാത്തത്' എന്നും ഗണേശ് കുമാര് പരിഹസിച്ചു. സമുദായത്തിലെ യുവതീ യുവാക്കള്ക്ക് മാന്യമായ തൊഴിലവസരങ്ങള് സൃഷ്ടിക്കുന്നതിന് പകരം ചായക്കട തുടങ്ങാനാണ് പറയുന്നതെന്നും തിരുവനന്തപുരത്തെ പ്രമുഖ നായര് നേതാക്കന്മാര് ഇപ്പോള് ചായക്കട നടത്തുകയാണെന്നും അദ്ദേഹം കൂട്ടിച്ചേര്ത്തു. എന്.എസ്.എസ് കൊട്ടാരക്കര താലൂക്ക് യൂണിയന് പ്രസിഡന്റ് സ്ഥാനത്തുനിന്ന് മാറ്റിയ സമയത്തും സംഘടനയ്ക്കെതിരെ ഗണേശ് കുമാര് വിമര്ശനങ്ങള് ഉന്നയിച്ചിട്ടുണ്ട്.
https://www.facebook.com/Malayalivartha
