കേരള സർക്കാരിന്റെ നോർക്കാ കെയർ പ്രവാസി ആരോഗ്യ ഇൻഷുറൻസ് പദ്ധതിയുടെ പുതുക്കിയ രൂപത്തിൽ പ്രീമിയം കുത്തനെ വർധിപ്പിച്ചതിൽ ഓവർസീസ് എൻ സി പി ശക്തമായ പ്രതിഷേധം രേഖപ്പെടുത്തുന്നു.പ്രവാസികൾക്ക് ആശ്വാസവും ആരോഗ്യസുരക്ഷയും നൽകേണ്ട പദ്ധതി, അവർക്ക് താങ്ങാനാകാത്ത സാമ്പത്തിക ബാധ്യതയായി മാറുന്നത് അംഗീകരിക്കാനാവില്ല. ജീവിതച്ചെലവുകളും കുടുംബത്തിന്റെ ഉത്തരവാദിത്വങ്ങളും നിറവേറ്റാൻ പ്രയാസപ്പെടുന്ന സാധാരണ പ്രവാസികൾക്ക് ഈ വർധന ഇരുട്ടടിയാണ്.

കഴിഞ്ഞ ഇടതുപക്ഷ ജനാധിപത്യ മുന്നണി സർക്കാർ നടപ്പിലാക്കിയ പ്രവാസി ഇൻഷുറൻസ്, പെൻഷൻ പദ്ധതികൾ- പ്രവാസികളുടെ ക്ഷേമവും ഭാവി സുരക്ഷയും മുൻനിർത്തിയുള്ള നടപടിയായിരുന്നു. ആ ക്ഷേമ സമീപനത്തിൽനിന്ന് വ്യത്യസ്തമായി, നോർക്കാ കെയർ പ്രവാസി ആരോഗ്യ ഇൻഷുറൻസ് പദ്ധതിയിൽ പ്രീമിയമായി വൻതുക ഈടാക്കുന്നത് പ്രവാസികളുടെ താത്പര്യങ്ങളെക്കാൾ ഇൻഷുറൻസ് കമ്പനികളുടെ താത്പര്യങ്ങൾ സംരക്ഷിക്കുന്നതിനാണ് സഹായകമാകുന്നത്. സർക്കാർ മുൻഗണന നൽകേണ്ടത് പ്രവാസികളുടെ താത്പര്യങ്ങൾ സംരക്ഷിക്കുന്നതിനാണ്.

അമിത പ്രീമിയം അടിച്ചേൽപ്പിച്ച്, സാമ്പത്തികശേഷിയുള്ളവർക്ക് മാത്രം ചേരാനാകുന്ന നിലയിലേക്ക് ഒരു ക്ഷേമപദ്ധതി മാറുന്നത് അതിന്റെ പ്രഖ്യാപിത ലക്ഷ്യത്തെത്തന്നെ ചോദ്യം ചെയ്യുന്നു. സാധാരണ പ്രവാസികളെ പദ്ധതിയിൽനിന്ന് അകറ്റുന്ന ഈ പ്രീമിയം വർധന, ഫലത്തിൽ പദ്ധതിയെ അട്ടിമറിക്കാനുള്ള ശ്രമമായി വേണം കരുതാൻ.കേരള സർക്കാരും നോർക്കയും ഈ വിഷയത്തിൽ അടിയന്തരമായി ഇടപെടണം. അമിത പ്രീമിയം വർധന പിൻവലിച്ച്, സാധാരണ പ്രവാസികൾക്കും കുടുംബങ്ങൾക്കും താങ്ങാനാകുന്ന നിരക്കിൽ നോർക്കാ കെയർ പ്രവാസി ആരോഗ്യ ഇൻഷുറൻസ് പദ്ധതി ലഭ്യമാക്കണം.പ്രവാസികളുടെ ആരോഗ്യസുരക്ഷ ഉറപ്പാക്കേണ്ട പദ്ധതി അവരെ സാമ്പത്തികമായി പിഴിയാനുള്ള സംവിധാനമായി മാറരുത്. പ്രവാസികളുടെ ആശങ്കകൾ ഗൗരവത്തോടെ പരിഗണിച്ച് പ്രീമിയം വർധന പുനഃപരിശോധിക്കണമെന്ന് ഓവർസീസ് എൻ സി പി ഭാരവാഹികൾ ആവശ്യപ്പെടുന്നു.