അമേരിക്കയുമായുള്ള കടുത്ത നിയന്ത്രണങ്ങളും തർക്കങ്ങളും നിലനിൽക്കുന്ന പശ്ചാത്തലത്തിൽ, തങ്ങളുടെ പ്രതിരോധ കോട്ട ശക്തമാക്കി പുതിയ ഭൂഗർഭ 'മിസൈൽ സിറ്റി' വെളിപ്പെടുത്തി ഇറാൻ. അത്യാധുനിക ബാലിസ്റ്റിക്, ക്രൂയിസ് മിസൈലുകളും അവയുടെ വിക്ഷേപണ ലോഞ്ചറുകളും വൻതോതിൽ സംഭരിച്ചിരിക്കുന്ന അത്ഭുതപ്പെടുത്തുന്ന ഒരു ഭൂഗർഭ സങ്കേതമാണിത്. ഇറാന്റെ സൈനിക വിഭാഗമായ ഇസ്ലാമിക് റവല്യൂഷണറി ഗാർഡ് കോർ (IRGC) ആണ് ഈ അത്യാധുനിക ഭൂഗർഭ കേന്ദ്രത്തിന്റെ ദൃശ്യങ്ങൾ പുറത്തുവിട്ടത്. ഇസ്ലാമിക് ഗാർഡിന്റെ എയറോസ്പേസ് വാരത്തോടനുബന്ധിച്ച് തസ്നീം ന്യൂസ് ഏജൻസിയാണ് ഈ വിവരങ്ങൾ റിപ്പോർട്ട് ചെയ്തത്. ഇറാനിയൻ സായുധ സേന ചീഫ് ഓഫ് സ്റ്റാഫ് മേജർ ജനറൽ അലി അബ്ദൊല്ലാഹി, ഐആർജിസി എയറോസ്പേസ് ഫോഴ്സ് കമാൻഡർ ബ്രിഗേഡിയർ ജനറൽ മജീദ് മൂസവി എന്നിവർ പങ്കെടുത്ത ചടങ്ങിലാണ് ഈ ഭൂഗർഭ കോട്ടയുടെ ഉദ്ഘാടനം നിർവ്വഹിച്ചത്. സുരക്ഷ ഉറപ്പാക്കുന്നതിന്റെ ഭാഗമായി മിസൈലുകളുടെയും ഡ്രോണുകളുടെയും ഉത്പാദന ശൃംഖലകൾ മുഴുവനായി ഭൗമോപരിതലത്തിൽ നിന്നും ഇത്തരം ഭൂഗർഭ അറകളിലേക്ക് മാറ്റിയതായി ഇറാന്റെ സൈനിക വക്താക്കൾ അറിയിച്ചു. ഇവ വെറുമൊരു ആയുധ സംഭരണശാലകൾ മാത്രമല്ല, സ്വയംപര്യാപ്തമായ മിസൈൽ ഉൽപ്പാദന കേന്ദ്രങ്ങൾ കൂടിയാണ്. മുൻപത്തെ യുഎസ്-ഇസ്രായേൽ ആക്രമണങ്ങളിൽ ഇറാന്റെ മിസൈൽ ശേഖരത്തിൽ നേരിയ കുറവ് വന്നിട്ടുണ്ടെന്ന് ചില അന്താരാഷ്ട്ര റിപ്പോർട്ടുകൾ സൂചിപ്പിക്കുന്നുണ്ടെങ്കിലും, ഇറാന്റെ ഭൂഗർഭ മിസൈൽ കേന്ദ്രങ്ങളിൽ 90 ശതമാനവും ഇപ്പോഴും പൂർണ്ണ സജ്ജമായിത്തന്നെ തുടരുകയാണ്. ഏത് പ്രതിസന്ധി ഘട്ടത്തിലും ശത്രുക്കളുടെ കേന്ദ്രങ്ങൾ ആക്രമിക്കാൻ തങ്ങൾക്ക് സാധിക്കുമെന്ന ശക്തമായ മുന്നറിയിപ്പാണ് ഈ പുതിയ നീക്കത്തിലൂടെ ഇറാൻ ലോകത്തിന് നൽകുന്നത്.