പ്രശസ്ത സ്‌പോര്‍ട്‌സ് ലേഖകന്‍ ഭാസി മലാപ്പറമ്പ് അന്തരിച്ചു. 86 വയസ്സായിരുന്നു. കോഴിക്കോട് മലാപ്പറമ്പിലെ വസതിയില്‍ വെച്ചായിരുന്നു അന്ത്യം. ലോകകപ്പ് ഫുട്‌ബോള്‍ നേരിട്ട് പോയി പലവട്ടം റിപ്പോര്‍ട്ട് ചെയ്തിട്ടുണ്ടായിരുന്നു.

1982 മുതൽ 2014 വരെയുള്ള കാലഘട്ടത്തിലെ എട്ട് ഫിഫ ലോകകപ്പുകളും 2008-ലെ യൂറോ കപ്പും വിവിധ മലയാളം പത്രങ്ങൾക്കും ദൃശ്യമാധ്യമങ്ങൾക്കുമായി റിപ്പോർട്ട് ചെയ്തിട്ടുണ്ട്. മലാപ്പറമ്പ് കുളങ്ങരക്കണ്ടി ചന്തുക്കുട്ടിയുടെയും ചിരുതക്കുട്ടിയുടെയും മകനായി ജനിച്ചു. വിദ്യാഭ്യാസത്തിനുശേഷം പൊതുമരാമത്തു വകുപ്പിൽ എൻജിനീയറായി. 1996ൽ ആണു വിരമിച്ചത്.

1986-ൽ അർജന്റീന കിരീടം നേടിയ മെക്സിക്കോ ലോകകപ്പും മറഡോണയുടെ പ്രകടനങ്ങളും നേരിട്ട് റിപ്പോർട്ട് ചെയ്തവയിൽപ്പെടുന്നുണ്ട്.
ഇന്ത്യയിൽ തന്നെ ഏറ്റവും കൂടുതൽ ഫിഫ ലോകകപ്പ് കവർ ചെയ്ത മാധ്യമ പ്രവർത്തകനായിരുന്നു അദ്ദേഹം . ഫുട്ബോൾ ഇതിഹാസങ്ങളായ പെലെ, മറഡോണ തുടങ്ങിയവരുമായി നേരിട്ട് സംവദിച്ചിട്ടുണ്ട്. 'കോഴിക്കോടിന്റെ കായിക പൈതൃകം', 'മനസ്സുകൾ സാഗരങ്ങൾ' തുടങ്ങിയ പുസ്തകങ്ങൾ രചിക്കുകയും ചെയ്തിട്ടുണ്ട്.
പ്രേംനസീർ നായകനായ ‘ഫുട്‌ബോൾ ചാംപ്യൻ’ എന്ന സിനിമയിൽ അഭിനയിച്ചിട്ടുണ്ട്. 2002ലെ ലോകകപ്പ് വേദിയിൽ സോളിലെ (ദക്ഷിണ കൊറിയ) ഏറ്റവും മികച്ച വിദേശ ലേഖകനുള്ള അവാർഡ് നേടി. ജലസേചന വകുപ്പിൽനിന്നു വിരമിച്ച എൻജിനീയർ പരേതയായ പാറക്കുളങ്ങര പാർവതിയാണ് ഭാര്യ. മക്കൾ: സുതീഭ്, പ്രസീത്. സംസ്കാരം ഇന്നു വൈകിട്ട് 6ന് മാവൂർ റോഡ് സ്മൃതിപഥത്തിൽ നടക്കും.