ഒമ്പതുപേരുടെ മരണത്തിനിടയാക്കിയ സ്വകാര്യ വിമാനാപകടത്തില്‍ സഹപൈലറ്റായിരുന്നത് വെറും 20 വയസ്സുള്ള യുവതി. നതാലിയ ഗഡേല്‍ഹ ഫില്‍ഗ്വെയ്റസ് എന്ന യുവതിയാണ് ഞായറാഴ്ച അമേരിക്കയിലെ ഫ്ളോറിഡയില്‍ തകര്‍ന്നുവീണ ലിയര്‍ജെറ്റ് 60 വിമാനത്തിന്റെ സഹപൈലറ്റായിരുന്നത്. വിമാനം നിയന്ത്രണം വിട്ട് താഴേക്ക് പതിക്കുന്നതിനിടെ പൈലറ്റ് കര്‍ത്താവിനോട് പ്രാര്‍ഥിച്ചതും, യര്‍ ട്രാഫിക് കണ്‍ട്രോളുമായി നടത്തിയ അവസാന സംഭാഷണവും പുറത്തുവന്നു.

പാം ബീച്ച് കൗണ്ടിയില്‍ വളര്‍ന്ന നതാലിയയ്ക്ക് 2023ല്‍ 17 വയസ്സുള്ളപ്പോഴാണ് പൈലറ്റ് ലൈസന്‍സ് ലഭിച്ചത്. ചെറുപ്പത്തില്‍ തന്നെ വിമാനം പറത്താന്‍ തുടങ്ങിയതിനെക്കുറിച്ച് അവര്‍ ഒരു പ്രാദേശിക മാധ്യമത്തിന് അഭിമുഖം നല്‍കിയിരുന്നു. 'മറ്റുള്ളവര്‍ നിങ്ങള്‍ക്ക് കാറോടിക്കാന്‍ അറിയില്ലെന്ന് പറയുമ്പോള്‍, എനിക്ക് വിമാനം പറത്താനറിയാമെന്ന് മറുപടി നല്‍കും. അതില്‍ എനിക്ക് അഭിമാനമുണ്ട്' എന്നായിരുന്നു അന്ന് നതാലിയ പറഞ്ഞത്.

അച്ഛന്‍ അലനും പൈലറ്റാണ്. അമ്മ കാമില മക്കളുമൊത്തുള്ള സ്വകാര്യ വിമാനയാത്രകളുടെ ചിത്രങ്ങള്‍ സമൂഹമാധ്യമങ്ങളില്‍ പങ്കുവെക്കാറുണ്ടായിരുന്നു. വിമാനം പറത്തുന്നതിലൂടെ ലഭിക്കുന്ന സ്വാതന്ത്ര്യവും മുകളില്‍നിന്ന് ലോകം കാണുന്നതുമാണ് മകള്‍ക്ക് ഏറെ ഇഷ്ടമെന്ന് കാമില ന്യൂയോര്‍ക്ക് ടൈംസിനോട് പറഞ്ഞു.

'കര്‍ത്താവേ...' എന്ന് പ്രാര്‍ഥിച്ച് പൈലറ്റ്

അപകടത്തിന് തൊട്ടുമുമ്പ് വിമാനത്തിലുണ്ടായിരുന്ന പുരുഷ പൈലറ്റ് കര്‍ത്താവിനോടുള്ള പ്രാര്‍ഥന ചൊല്ലുന്നതിന്റെ ശബ്ദരേഖയാണ് പുറത്തുവന്നത്. 'സ്വര്‍ഗസ്ഥനായ ഞങ്ങളുടെ പിതാവേ, അങ്ങയുടെ നാമം പൂജിതമാകണമേ' എന്നായിരുന്നു പ്രാര്‍ഥനയുടെ തുടക്കം.

ഇതിനിടെ വിമാനം 60 ഡിഗ്രി ചരിഞ്ഞാണ് പറക്കുന്നതെന്ന് നതാലിയ എയര്‍ ട്രാഫിക് കണ്‍ട്രോളിനെ അറിയിച്ചു. വിമാനം നിയന്ത്രണം നഷ്ടപ്പെട്ട് താഴേക്ക് പതിക്കുകയാണെന്ന് മനസ്സിലായതോടെ യുവതിയുടെ ശബ്ദത്തില്‍ പരിഭ്രാന്തി പ്രകടമായി. 'ഞങ്ങള്‍ താഴേക്ക് പതിക്കുകയാണ്. മെയ്ഡേ, മെയ്ഡേ...' എന്നായിരുന്നു ആദ്യ സന്ദേശം. പിന്നാലെ മിനിറ്റില്‍ 10,000 അടി വേഗത്തില്‍ വിമാനം താഴേക്ക് പതിക്കുകയാണെന്നും അറിയിച്ചു.