അഴിമതിക്കെതിരെയും അനീതിക്കെതിരെയും സമൂഹമാധ്യമങ്ങളിലൂടെയും അല്ലാതെയും ശക്തമായി പ്രതികരിച്ചതിന്റെ പേരിലാണ് ഐ.എ.എസ് ഉദ്യോഗസ്ഥനായ എന്‍. പ്രശാന്തിനെ കഴിഞ്ഞ പിണറായി സര്‍ക്കാര്‍ ദീര്‍ഘകാലം സസ്പെന്റ് ചെയ്ത് പുറത്തുനിര്‍ത്തിയത്. ഔദ്യോഗിക പദവിയിലിരുന്ന് സത്യസന്ധമായി കാര്യങ്ങള്‍ തുറന്നുപറഞ്ഞതിന് അദ്ദേഹത്തിന് അര്‍ഹതപ്പെട്ട പ്രമോഷനുകളും ആനുകൂല്യങ്ങളും മനപ്പൂര്‍വ്വം തടയപ്പെടുകയായിരുന്നു. ഭരണകൂടത്തിന്റെ ഈ ഏകപക്ഷീയമായ പ്രതികാര നടപടികള്‍ ഉദ്യോഗസ്ഥവൃത്തങ്ങളില്‍ വലിയ ചര്‍ച്ചകള്‍ക്കും പ്രതിഷേധങ്ങള്‍ക്കും വഴിവെച്ചിരുന്നു. എന്നാല്‍ യുഡിഎഫ് സര്‍ക്കാര്‍ അധികാരത്തില്‍ എത്തിയപ്പോളാണ് അദ്ദേഹം സര്‍വീസില്‍ തിരിച്ചെത്തിയത്. ഇപ്പോഴത്തെ രാഷ്ട്രീയ സാഹചര്യങ്ങളില്‍ വന്ന മാറ്റങ്ങളും തുടര്‍ന്നുള്ള സംഭവവികാസങ്ങളും അദ്ദേഹത്തിന് ഭരണതലത്തില്‍ പുതിയൊരു ഉയര്‍ത്തെഴുനേല്‍പ്പാണ് സമ്മാനിച്ചത്.

സസ്‌പെന്‍ഷന്‍ നടപടികള്‍ക്ക് ശേഷം സര്‍വീസിലേക്ക് തിരിച്ചെത്തിയ എന്‍. പ്രശാന്ത് തന്റെ രണ്ടാം വരവില്‍ കായിക വകുപ്പ് സ്പെഷ്യല്‍ സെക്രട്ടറിയായി മികച്ച പ്രവര്‍ത്തനമാണ് കാഴ്ചവെച്ചത്. അര്‍ജന്റീന ഫുട്‌ബോള്‍ ടീമിന്റെയും സൂപ്പര്‍താരം ലയണല്‍ മെസിയുടെയും പേരില്‍ അരങ്ങേറിയ റിപ്പോര്‍ട്ടര്‍ ടിവി നടത്തിയ 'മെസ്സികൊള്ള'യുടെ വ്യാപ്തിയും ക്രമക്കേടുകളും കേരള ജനതയെ ഔദ്യോഗികമായി അറിയിച്ചത് പ്രശാന്തിന്റെ റിപ്പോര്‍ട്ടായിരുന്നു. സര്‍ക്കാരിന്റെ അനുമതിയില്ലാതെയും നിയമപരമായ യാതൊരുവിധ കരാറുകളിലുമില്ലാതെ സ്വകാര്യ കമ്പനിക്ക് ആനുകൂല്യങ്ങള്‍ ഒഴുക്കിവിട്ട വന്‍ തട്ടിപ്പാണ് കായിക വകുപ്പ് പുറത്തുകൊണ്ടുവന്നത്. പ്രശാന്തിന്റെ റിപ്പോര്‍ട്ടിനെ തുടര്‍ന്ന് അന്വേഷണം പുരോഗമിക്കുകയാണ്. പുതിയൊരു കായിക കേരളം കെട്ടിപ്പടുക്കുവാന്‍ വേണ്ടി അദ്ദേഹം നടത്തിയ പരിശ്രമങ്ങളുടെ ഫലം വി ഡി സതീശന്‍ സര്‍ക്കാറിനും ബോധ്യപ്പെട്ടു. ഈ പശ്ചാത്തലത്തിലാണ് അദ്ദേഹത്തിന് കെഎസ്ഇബി ചെയര്‍മാര്‍ പദവി കൂടി നല്‍കുന്നത്.

അന്നത്തെ ചീഫ് സെക്രട്ടറിയായിരുന്ന ഡോ. എ. ജയതിലകുമായുള്ള കടുത്ത അഭിപ്രായവ്യത്യാസങ്ങളും തുറന്ന പോരുകളും കേരള ഭരണ ചരിത്രത്തില്‍ തന്നെ വലിയ കോലാഹലങ്ങള്‍ സൃഷ്ടിച്ചിരുന്നു. ജയതിലകിന്റെ ഔദ്യോഗിക നടപടികളെയും അധികാര ദുര്‍വിനിയോഗത്തെയും പ്രശാന്ത് പരസ്യമായി ചോദ്യം ചെയ്തത് ഉദ്യോഗസ്ഥ തലത്തില്‍ വലിയ ഭൂചലനങ്ങളാണ് ഉണ്ടാക്കിയത്. തുടര്‍ന്ന് മുന്‍ ചീഫ് സെക്രട്ടറി ജയതിലകുമായുള്ള പ്രശ്നങ്ങള്‍ മൂര്‍ച്ഛിക്കുകയും ചെയ്തിരുന്നു. പ്രശാന്തിനെതിരെ സര്‍ക്കാര്‍ കടുത്ത അച്ചടക്ക നടപടികള്‍ സ്വീകരിക്കുകയും ചെയ്തു.