ഭരണപരിഷ്‌കാര കമ്മിഷന്‍ അധ്യക്ഷസ്ഥാനം കാബിനറ്റ് റാങ്കോടെ ഏറ്റെടുക്കാന്‍ ഒരുങ്ങുന്ന വി.എസ്.അച്യുതാനന്ദന്റെ പേരില്‍ മുതിര്‍ന്ന ഐഎഎസ്, ഐപിഎസ് ഉദ്യോഗസ്ഥര്‍ക്കെതിരെ മുഖ്യമന്ത്രിക്കു കത്ത്. അഴിമതിക്കാരായ ഒന്‍പത് ഉദ്യോഗസ്ഥരെ താക്കോല്‍സ്ഥാനങ്ങളില്‍ നിയമിക്കരുതെന്നു മുഖ്യമന്ത്രിയോട് ആവശ്യപ്പെട്ടുകൊണ്ടാണ് കത്ത് എഴുതിയിരിക്കുന്നത്. ഒപ്പം വിഴിഞ്ഞം തുറമുഖ പദ്ധതി അദാനി ഗ്രൂപ്പില്‍ നിന്ന് ഏറ്റെടുക്കണമെന്ന് ആവശ്യപ്പെടുന്ന മറ്റൊരു കത്തും ചര്‍ച്ചയാകുകയാണ്. എന്നാല്‍ ഇങ്ങനെ കത്തുകള്‍ എഴുതിയിട്ടില്ലെന്നും ഇതു വ്യാജമായി തയ്യാറാക്കിയതാവാമെന്നുമാണു വി.എസ്.അച്യുതാനന്ദന്റെ ഓഫിസ് അറിയിച്ചത്. കത്തിന്റെ ഉറവിടത്തെക്കുറിച്ചു ഗൗരവമായ സംശയങ്ങള്‍ ഉണ്ടെന്നു വിഎസിനോട് അടുപ്പമുള്ളവര്‍ ചൂണ്ടിക്കാട്ടി.
ഐഎഎസ്- ഐപിഎസ് തലപ്പത്തെ ഒന്‍പത് ഉദ്യോഗസ്ഥര്‍ക്കെതിരെ അക്കമിട്ട് ആരോപണങ്ങള്‍ നിരത്തിയാണു കത്ത്. അഴിമതിമുക്തമായ ഭരണസംവിധാനത്തില്‍ സര്‍ക്കാരിന്റെ ദൈനംദിന ഇടപാടുകളുമായി ബന്ധപ്പെടുന്ന ഒരു തസ്തികയിലും ഇവര്‍ക്കു നിയമനം നല്‍കരുതെന്നാണ് ആവശ്യം. 'അഭിവാദനങ്ങളോടെ വി.എസ്.അച്യുതാനന്ദന്‍' എന്ന ഭാഗത്ത് 'ഒപ്പ്' എന്നു മാത്രമേ രേഖപ്പെടുത്തിയിട്ടുള്ളു. യഥാര്‍ഥത്തില്‍ ഒപ്പിട്ടിട്ടില്ല. വി.എസ് ഇങ്ങനെ ഒപ്പിടാതെ കത്തയയ്ക്കാറില്ലെന്ന് അദ്ദേഹത്തിന്റെ ഓഫിസ് വ്യക്തമാക്കി. വി.എസ്.അച്യുതാനന്ദന്‍ എംഎല്‍എ എന്ന പേരില്‍ ലെറ്റര്‍പാഡും അച്ചടിച്ചു കിട്ടിയിട്ടില്ല. ഉദ്യോഗസ്ഥര്‍ക്കെതിരെ കത്തെഴുതിയ ജൂണ്‍ ഒന്നിനു തന്നെ വിഴിഞ്ഞം തുറമുഖ പദ്ധതിക്കെതിരെയും മറ്റൊരു കത്തുണ്ട്. 

അദാനിയുമായുള്ള ധാരണാപത്രം റദ്ദാക്കി, സര്‍ക്കാരിന്റെ അധീനതയില്‍ തന്നെ തുറമുഖം നിര്‍മിക്കാന്‍ നടപടി സ്വീകരിക്കണമെന്നും ആവശ്യപ്പെട്ടുള്ളതാണ് ഈ കത്ത്. ഇതില്‍ വിഎസിന്റെ ഒപ്പുണ്ട്. എന്നാല്‍ ഈ ഒപ്പും വ്യാജമാണെന്ന് ഓഫിസ് വ്യക്തമാക്കി. രണ്ടു കത്തുകളും തന്റെ ശ്രദ്ധയില്‍ പെട്ടിട്ടില്ലെന്നു മുഖ്യമന്ത്രിയുടെ പ്രിന്‍സിപ്പല്‍ സെക്രട്ടറി നളിനി നെറ്റോയും വ്യക്തമാക്കി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha