ഗാനഗന്ധര്‍വ്വന്‍ യേശുദാസ് ഹിന്ദുമതം സ്വീകരിച്ചെന്ന സൂചനയുമായി ബിജെപി നേതാവ് സുബ്രഹ്മണ്യം സ്വാമിയുടെ ട്വീറ്റ്. വിഖ്യാത ഗായകന്‍ ഹിന്ദുമതം ഔദ്യോഗികമായി സ്വീകരിച്ചോ എന്ന് ബിജെപി നേതാവ് സ്ഥിരീകരിക്കുന്നുമില്ല. ഊഹാപോഹത്തിന്റെ സ്വഭാവത്തിലാണ് ട്വീറ്റ്.

എന്നാല്‍ ട്വീറ്റില്‍ അടിസ്ഥാനമില്ലെന്നാണ് യേശുദാസുമായുള്ള അടുത്ത വൃത്തങ്ങള്‍ നല്‍കുന്ന സൂചന. മൂകാംബിക ക്ഷേത്ര ദര്‍ശനത്തിലെ ചിത്രങ്ങള്‍ കണ്ട് തെറ്റിധരിച്ചതാകാം ട്വീറ്റിന് അടിസ്ഥാനമെന്നും അവര്‍ പറയുന്നു. വാര്‍ത്ത ശരിയാണെങ്കില്‍ തന്റെ മുന്‍ഗാമികളുടെ മതത്തിലേക്ക് മടങ്ങിയെത്തിയ പാട്ടുകാരന്‍ യേശുദാസിനെ ഹിന്ദുക്കളെല്ലാം സ്വാഗതം ചെയ്യണമെന്നാണ് സുബ്രഹ്മണ്യം സ്വാമി ആഹ്വാനം ചെയ്തത്.

ജനനം ക്രൈസ്തവനായിട്ടാണെങ്കിലും യേശുദാസ് ഹൈന്ദവ രീതികളാണ് പിന്തുടര്‍ന്ന് പോന്നത്. മൂകാംബിക ക്ഷേത്രത്തിലാണ് പിറന്നാള്‍ ആഘോഷിക്കുന്നത്. പ്രധാന ക്ഷേത്രങ്ങളില്‍ എല്ലാം പോവുകയും ചെയ്യും. ഗുരുവായൂരില്‍ പ്രവേശിക്കുകയാണ് തന്റെ സ്വപ്‌നമെന്നും പറഞ്ഞിട്ടുണ്ട്. എന്നാല്‍ അഹിന്ദുക്കള്‍ക്ക് പ്രവേശനം നിഷേധിക്കുന്നതിനാല്‍ ഗുരുവായൂരില്‍ കടക്കാന്‍ യേശുദാസിന് തടസ്സമായി. ഈ സാഹചര്യത്തിലാണ് സുബ്രഹ്മണ്യം സ്വാമിയുടെ ട്വീറ്റ് ചര്‍ച്ചയാകുന്നതും. 

ലോകത്തെ എല്ലാ മനുഷ്യര്‍ക്കും നന്മയുണ്ടാകാന്‍ പ്രാര്‍ത്ഥിക്കുന്ന മതമാണ് ഹിന്ദുമതമെന്ന് തുറന്ന് പറയുന്ന വ്യക്തിയാണ് യേശുദാസ്. ഹിന്ദുമതം ഒരു ജീവിതചര്യയാണെന്നും യേശുദാസ് വിശദീകരിച്ചിരുന്നു. ജാതിമത ചിന്തകള്‍ക്ക് അപ്പുറത്ത് ലഭിക്കുന്ന ഈശ്വര ചൈതന്യമാണ് ധ്യാനങ്ങളിലൂടെ നമുക്ക് ലഭിക്കുകയെന്നായിരുന്നു അഭിപ്രായം. അതുകൊണ്ട് കൂടിയാണ് യേശുദാസ് ഹിന്ദുമതത്തിലേക്ക് ഔദ്യോഗികമായെത്തിയെന്ന സുബ്രഹ്മണ്യം സ്വാമിയുടെ പ്രസ്താവനയ്ക്ക് പ്രാധാന്യം കൂടുന്നത്.

യേശുദാസിന്റെ ഗുരുവായൂര്‍ പ്രവേശനം കേരളീയ പൊതുസമൂഹം ഏറെ ചര്‍ച്ച ചെയ്തതുമാണ്. ''ഗുരുവായൂരപ്പനെക്കുറിച്ച് ഞാന്‍ ഒരുപാട് പാട്ടുകള്‍ പാടിയിട്ടുണ്ട്. പക്ഷേ, ക്ഷേത്രത്തിനകത്തു കയറി കണ്ണനെ കാണാന്‍ എനിക്ക് ഇനിയും കഴിഞ്ഞിട്ടില്ല'' ഗാനഗന്ധര്‍വന്‍ യേശുദാസ് പല വേദികളിലും ഇത് പറഞ്ഞിട്ടുണ്ട്. സംഗീതക്കച്ചേരികളില്‍ 'ഒരുനേരമെങ്കിലും കാണാതെ വയ്യെന്റെ ഗുരുവായൂരപ്പാ നിന്‍ ദിവ്യരൂപം...' എന്ന ദ്വിജാവന്തി രാഗത്തിലുള്ള ഗാനം പാടി തന്റെ വേദന പങ്കുവച്ചിട്ടുമുണ്ട്. ഉഡുപ്പി ശ്രീകൃഷ്ണക്ഷേത്രത്തിലും തിരുപ്പതിയിലും ദര്‍ഗകളിലുമെല്ലാം ഞാന്‍ പോയിട്ടുണ്ട്. കൃഷ്ണനെക്കുറിച്ച് ഒട്ടേറെ പാട്ടുകള്‍ പാടിയിട്ടുള്ള എനിക്ക് ഗുരുവായൂര്‍ ക്ഷേത്രത്തിനകത്ത് കയറാനുള്ള ഭാഗ്യമുണ്ടായിട്ടില്ല. ഇതിനെതിരെ പലരും ശബ്ദമുയര്‍ത്തി. പ്രതികരിക്കണമെന്ന് ആവശ്യപ്പെട്ട് ആളുകള്‍ വന്നു. പക്ഷേ, ഞാന്‍ പറഞ്ഞു: ''ഗുരുവായൂരപ്പന്‍ എന്റെ അപ്പനാണ്. അച്ഛനും മകനുംതമ്മിലുള്ള വിഷയം ഞങ്ങള്‍ തീര്‍ത്തോളാം.'ഇങ്ങനെയായിരുന്നു വിഷയത്തെ യേശുദാസ് കണ്ടിരുന്നത്. അപ്പോഴും ക്രൈസ്തവ രീതികള്‍ വിട്ടുപോയതായി യേശുദാസ് പ്രഖ്യാപിച്ചിട്ടില്ല.

സുബ്രഹ്മണ്യം സ്വാമിയുടെ ട്വീറ്റില്‍ സ്ഥിരീകരണം നല്‍കേണ്ടതും യേശുദാസ് തന്നെയാണ്. അമേരിക്കയില്‍ കഴിയുന്ന യേശുദാസ് വിഷയത്തില്‍ ഉടന്‍ വ്യക്തത വരുത്തുമെന്നാണ് സൂചന.
സംഗീതനാടക നടനായ ശ്രീ അഗസ്റ്റിന്‍ ജോസഫിനും ശ്രീമതി എലിസബത്ത് ജോസഫിനും മൂത്ത മകനായി 1940 ജനുവരി പത്താം തീയതി ജനിച്ചു. അഞ്ചു മക്കളില്‍ മൂത്തവനായിരുന്നു യേശുദാസ്. ജാതിഭേദം മതദ്വേഷം ഏതുമില്ലാതെ സര്‍വ്വരും സോദരത്വേന വാഴുന്ന മാതൃകാ സ്ഥാനമാണിത് ' എന്ന ഗാനത്തോടെയാണ് സിനിമയില്‍ എത്തിയത്. മലയാളത്തില്‍ ഇതുവരെ അദ്ദേഹം 5000ലധികം സിനിമാഗാനങ്ങള്‍ പാടിയിട്ടുണ്ട്. ഭാരതത്തിലെ അസ്സമിയ, കാശ്മീരി, കൊങ്കണി എന്നിവ ഒഴിച്ച് മറ്റെല്ലാ ഭാഷകളിലും അദ്ദേഹം പാടിയിട്ടുണ്ട്. വിദേശ ഭാഷകളില്‍ ഇംഗ്ലീഷ്, അറബി , റഷ്യന്‍, ലാറ്റിന്‍ ഇവയിലും ഗാനങ്ങള്‍ പാടിയിട്ടുണ്ട്.

1970 ഫെബ്രുവരി ഒന്നാം തീയതി, മല്ലപ്പള്ളിയില്‍ നിന്ന് തിരുവനന്തപുരത്തു വന്നു താമസമാക്കിയ വലിയവീട്ടില്‍ കുരിയന്‍ എബ്രഹാമിന്റെയും അമ്മിണിയുടെയും പുത്രി പ്രഭയുമായുള്ള അദ്ദേഹത്തിന്റെ വിവാഹം കൊച്ചിയിലെ സാന്റാ ക്രൂസ് കത്തീഡ്രലില്‍ വച്ച് നടന്നു. മൂന്നു ആണ്‍ മക്കള്‍ക്ക് വിനോദ്, വിജയ്, വിശാല്‍ എന്ന് പേരിട്ടു. ഇപ്പോള്‍ അമേയ എന്ന് ഒരു ഓമന കൊച്ചുമകളും അദ്ദേഹത്തിനുണ്ട്.
ക്രിസ്തീയ, ഹൈന്ദവ, ഇസ്ലാം തുടങ്ങിയ എല്ലാ മതവിഭാഗങ്ങളും വിശ്വസിക്കുന്നത് ഒരേ ദൈവത്തില്‍ തന്നെയാണെന്ന് കരുതുന്ന യേശുദാസ് മതസൗഹാര്‍ദ്ദത്തിന്റെ ഒരു തികഞ്ഞ വക്താവായാണ് അറിയപ്പെടുന്നത്. കലാകാരന്മാര്‍ക്ക് സാമൂഹിക ബോധം ആവശ്യമാണ് എന്ന് വിശ്വസിക്കുന്ന ആളാണ് യേശുദാസ്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha