പഴകി ദ്രവിച്ച കോച്ചുകള്‍ കാരണമുള്ള അപകടം വീണ്ടും. നിലമ്പൂരില്‍ നിന്നും തിരുവനന്തപുരത്തേക്ക്‌ പോകുകയായിരുന്ന രാജ്യറാണി എക്‌സ്‌പ്രസ്‌ ചങ്ങനാശ്ശേരിക്ക്‌ സമീപം ബുധനാഴ്‌ച വെളുപ്പിന്‌ പാളം തെറ്റി. ആര്‍ക്കും പരിക്കില്ല. കോട്ടയം കൊല്ലം റൂട്ടില്‍ 5 മണിക്കൂറോളം തടസപ്പെട്ട ട്രെയില്‍ ഗതാഗതം പുനസ്ഥാപിച്ചു. പഴകി ദ്രവിച്ച എ.സി. കോച്ചാണ്‌ പാളം തെറ്റിയത്‌. ട്രാക്കില്‍ നിന്നും ശബ്‌ദവും പുകയും വരുന്നത്‌ കണ്ട്‌ യാത്രക്കാര്‍ അപായച്ചങ്ങല വലിച്ചാണ്‌ ട്രെയിന്‍ നിര്‍ത്തിയത്‌. നമ്മുടെ ട്രിയിനിന്റെ ശോചനീയാവസ്ഥയ്‌ക്ക്‌ സാക്ഷിയായി ദ്രവിച്ച തകര ഷീറ്റുകള്‍ പാളത്തില്‍ കാണാവുന്നതാണ്‌. ബോഗികളുടെ കാലപ്പഴക്കമാണ്‌ അപകടത്തിന്‌ കാരണമായി റെയില്‍വേ തന്നെ വിലയിരുത്തുന്നത്‌. കാലപ്പഴക്കം കൊണ്ട്‌ മറ്റൊരു ട്രെയിനും അപകടത്തില്‍ പെട്ടിരുന്നു. ഇക്കഴിഞ്ഞ നവംബര്‍ 29ന്‌ ആലപ്പുഴ റെയില്‍വേ സ്റ്റേഷനില്‍ നിര്‍ത്തുന്നതിനിടെ പാസഞ്ചര്‍ ട്രെയിനിന്റെ ബോഗി ഇളകിത്തെറിച്ചിരുന്നു. അപകടങ്ങള്‍ തുടര്‍ക്കഥയാകുമ്പോഴും പഴയ ബോഗികളോ പഴയ എഞ്ചിനുകളോ അറ്റകുറ്റപ്പണി നടത്താനോ മാറ്റാനോ റെയില്‍വേ മടിക്കുകയാണ്‌.