കടുത്ത മാനസിക വിഷമത്തെത്തുടർന്ന് പ്രിയപ്പെട്ട വിദ്യാർത്ഥികൾക്കായി വിടപറച്ചിൽ വിഡിയോ സോഷ്യൽ മീഡിയയിൽ പങ്കുവെച്ച ശേഷം യുവ അധ്യാപകൻ ട്രെയിൻ തട്ടി മരിച്ച നിലയിൽ. കിളിമാനൂർ നഗരൂർ വെള്ളല്ലൂർ സ്വദേശിയും ഏവിയേഷൻ ട്രെയിനറുമായ ജോഷ്മിൻ (36) ആണ് ചിറയിൻകീഴ് മഞ്ചാടിമൂട് റെയിൽവേ ഗേറ്റിന് സമീപം തീവണ്ടിക്കു മുന്നിൽ ചാടി ജീവനൊടുക്കിയത്.

കഴക്കൂട്ടം കുളത്തൂരിലെ വാടകവീട്ടിൽ ഒറ്റയ്ക്ക് താമസിച്ചിരുന്ന ജോഷ്മിൻ, മരണത്തിന് മണിക്കൂറുകൾക്ക് മുൻപാണ് തന്റെ വിദ്യാർത്ഥികളോട് സംസാരിക്കുന്ന വൈകാരികമായ വിഡിയോ പങ്കുവെച്ചത്. കടുത്ത ഡിപ്രഷൻ മൂലമാണ് താൻ ഈ തീരുമാനമെടുക്കുന്നതെന്നും, ആരെയും ആത്മാവ് കൊണ്ട് സ്നേഹിക്കരുതെന്നും വിഡിയോയിൽ ജോഷ്മിൻ പറയുന്നുണ്ട്. സംഭവത്തിൽ ചിറയിൻകീഴ് പോലീസ് അസ്വാഭാവിക മരണത്തിന് കേസെടുത്ത് വിശദമായ അന്വേഷണം ആരംഭിച്ചിട്ടുണ്ട്.