തന്റെ ജന്മദിനാഘോഷം വിവാദമായതിനെത്തുടര്‍ന്ന് ട്രാന്‍സ്‌പോര്‍ട്ട് കമ്മീഷണര്‍ ടോമിന്‍ തച്ചങ്കരി പരസ്യമായി ഖേദപ്രകടനം നടത്തി. ഗതാഗത മന്ത്രി എ.കെ ശശീന്ദ്രന്‍ കൂടി പങ്കെടുത്ത ചടങ്ങിലായിരുന്നു തച്ചങ്കരിയുടെ ഖേദപ്രകടനം.സ്‌കൂള്‍ വിദ്യാര്‍ഥികള്‍ക്കുള്ള മോട്ടോര്‍ വാഹന വകുപ്പിന്റെ നേര്‍വഴി എന്ന സുരക്ഷാ ബോധവത്ക്കരണ പരിപാടിയുടെ കോഴിക്കോട് ജില്ലയിലെ പരിപാടിക്കിടെയാണ് തച്ചങ്കരി ഖേദപ്രകടനം നടത്തിയത്.

തന്റെ പണം ഉപയോഗിച്ചാണ് മധുരം വിളമ്പിയത്. താന്‍ മധുരം നല്‍കിയത് നല്ല ഉദ്ദേശ്യത്തിലാണ്. എന്നാല്‍ ഗതാഗത മന്ത്രിയും മുഖ്യമന്ത്രിയും ഉള്‍പ്പെടെ എന്റെ ഉന്നമനം ആഗ്രഹിക്കുന്നവര്‍ എല്ലാം അത് തെറ്റാണെന്നും ഒഴിവാക്കാമായിരുന്നുവെന്നും പറഞ്ഞു. അത് കേരളത്തിന്റെ മണ്ണില്‍ ഏറ്റില്ല. അങ്ങനെ തെറ്റായ ധാരണ പരന്നതിനാല്‍ ഖേദം പ്രകടിപ്പിക്കുന്നു. തച്ചങ്കരി പറഞ്ഞു.

കഴിഞ്ഞ ബുധനാഴ്ചയാണ് തച്ചങ്കരിയുടെ പിറന്നാള്‍ മോട്ടോര്‍ വാഹന വകുപ്പിന്റെ എല്ലാ ഓഫീസുകളിലും ആഘോഷിച്ചത്. ഇത് വിവാദമായതിനെത്തുടര്‍ന്ന് മന്ത്രി ഇക്കാര്യത്തില്‍ അന്വേഷണത്തിന് ഉത്തരവിട്ടിരുന്നു. ഇതിലാണ് ഇപ്പോള്‍ ഖേദം പ്രകടിപ്പിച്ചത്. പെട്രോള്‍ ലഭിക്കാന്‍ ഹെല്‍മെറ്റ് നിര്‍ബന്ധമാക്കിയ നടപടി മൂലം നഗരപ്രദേശങ്ങളില്‍ 90 ശതമാനത്തോളം ആളുകള്‍ ഹെല്‍മെറ്റ് ധരിക്കാന്‍ തീരുമാനിച്ചതായും ഗ്രാമങ്ങളിലേക്കു കൂടി ഇത് വ്യാപിക്കാന്‍ തുടങ്ങിയിരുന്നതായും തച്ചങ്കരി ചടങ്ങിനിടെ പറഞ്ഞു.

ഇതിന്റെ നിയമ സാധുത ചോദ്യം ചെയ്ത് നിരവധിപേര്‍ രംഗത്ത് വന്നിരുന്നു. എന്നാല്‍ ഹെല്‍മെറ്റ് നിര്‍ബന്ധമാക്കിയ നടപടി മൂലം ഇരുചക്രവാഹനങ്ങളില്‍ നിന്നുള്ള അപകട മരണ നിരക്ക് കുറഞ്ഞതായും എന്താണോ തങ്ങള്‍ ഉദ്ദേശിച്ചത് അതിന് വിവാദങ്ങള്‍ കൂടി ഉള്‍പ്പെട്ട പദ്ധതി ഗുണം ചെയ്തതായും തച്ചങ്കരി പറഞ്ഞു. ഏത് സന്ദേശമാണോ ഞങ്ങള്‍ ജനങ്ങളിലെത്തിക്കാന്‍ ശ്രമിച്ചത് അത് സൗജന്യമായി ഇത്തരം ചര്‍ച്ചകളിലൂടെ ജനങ്ങളിലെത്തിക്കാന്‍ സാധിച്ചു എന്നും തച്ചങ്കരി കൂട്ടിച്ചേര്‍ത്തു.