വീട്ടിലോടാന് സര്ക്കാര് വണ്ടി!
ഓഫീസില് നിന്നു വീട്ടിലേക്കും വീട്ടില് നിന്ന് ഓഫീസിലേക്കും സര്ക്കാര് വാഹനത്തില് ഉദ്യോഗസ്ഥരുടെ ദൈനംദിന യാത്ര. വീട്ടിലെത്തിയാല് വാഹനം അവിടെ പാര്ക്കിങ്. കുട്ടികളെ സ്കൂളുകളില് എത്തിക്കാനും ഷോപ്പിങ് നടത്താനും വ്യക്തിപരമായ ആവശ്യങ്ങള്ക്കും ഉപയോഗിക്കുന്നതു സര്ക്കാര് വാഹനങ്ങള്. ഭരണം മാറിയിട്ടും സംസ്ഥാനത്ത് ഉദ്യോഗസ്ഥ തലത്തില് സര്ക്കാര് വാഹനങ്ങളുടെ ദുരുപയോഗം വര്ധിച്ചു. ഔദ്യോഗിക ആവശ്യത്തിനല്ലാതെ സര്ക്കാര് വാഹനങ്ങള് ഉപയോഗിക്കരുതെന്ന് കാണിച്ച് പല തവണ ധനകാര്യ വകുപ്പ് ഉത്തരവുകള് ഇറക്കിയിട്ടും അതെല്ലാം കാറ്റില് പറത്തിയാണ് ഉദ്യോഗസ്ഥരുടെ ദുര്വിനിയോഗം.
എല്ലാദിവസവും സര്ക്കാര് വാഹനത്തില് വീട്ടില് പോകുകയും രാവിലെ വീട്ടില് നിന്ന് അതേ വാഹനത്തില് ഓഫീസിലെത്തുകയും ചെയ്തിരുന്ന കോഴിക്കോട്ടെ രണ്ടു തഹസില്ദാര്മാരെ ധനകാര്യ വകുപ്പിന്റെ ഇന്സ്പെക്ഷന് വിഭാഗം കഴിഞ്ഞ ദിവസം കൈയോടെ പിടികൂടിയതാണ് ഒടുവിലത്തെ സംഭവം. കോഴിക്കോട് തഹസില്ദാര് കെ.ബാലന്, അഡീഷണല് തഹസില്ദാര് ഇ.അനിതകുമാരി എന്നിവരുടെ വീടുകളിലാണ് റവന്യൂ വകുപ്പിന്റെ കെ.എല്. 11ബി.സി.1512 ബൊലേറൊ ജീപ്പ്, കെ.എല്.11 എ.എച്ച്.206 ടാറ്റാ സ്പേസിയോ സുമോ എന്നിവ കണ്ടെത്തിയത്.
ബാലുശേരി എകരൂല് സ്വദേശിയായ ബാലന് ഓഫീസ് വിട്ട് വീട്ടിലെത്തിയിരുന്നതും ഓഫീസിലേക്ക് പോയിരുന്നതും സര്ക്കാര് വാഹനത്തിലാണെന്ന പരാതിയെത്തുടര്ന്നാണ് പരിശോധന നടന്നത്. മുക്കത്തിനടുത്ത കുറ്റിപ്ലാക്കലാണ് അനിതകുമാരിയുടെ വീട്. വീടിനോടു ചേര്ന്ന് നിര്ത്തിയിട്ട വാഹനം രാത്രി ഏഴരയ്ക്കാണ് ധനകാര്യ വകുപ്പിന്റെ ഇന്സ്പെക്ഷന് വിഭാഗം കണ്ടെത്തിയത്. ബാലന്റെ വീടീനു സമീപത്തു നിന്നാണ് അന്നു തന്നെ വൈകിട്ട് ആറരയ്ക്ക് വാഹനം കണ്ടെത്തിയത്.
കൊയിലാണ്ടി താലൂക്ക് പരിധിയിലാണ് എകരൂല്. ഇവര് രണ്ടുപേരും നേരത്തെ സര്ക്കാര് വാഹനം വീട്ടില് കൊണ്ടുപോയിരുന്നതു സംബന്ധിച്ച് ധനവകുപ്പ് ഉദ്യോഗസ്ഥര് താക്കീതു ചെയ്തിരുന്നതാണ്. എന്നാല് അന്ന് ധനവകുപ്പ് സെക്രട്ടറിക്ക് റിപ്പോര്ട്ട്് ചെയ്തിരുന്നില്ല. ഇത്തവണ ധനകാര്യ വകുപ്പു സെക്രട്ടറിക്കു റിപ്പോര്ട്ട് നല്കിയിട്ടുണ്ട്. വിശദമായ റിപ്പോര്ട്ട് ഒരാഴ്ചയ്ക്കകം സമര്പ്പിക്കും.
ധനവകുപ്പ് ആസ്ഥാനത്തു നിന്ന് റവന്യൂ കമ്മിഷണറെയാണ് വാഹന ദുരുപയോഗം സംബന്ധിച്ച കാര്യം അറിയിക്കുക. അദ്ദേഹമാണ് നടപടിക്കു ശിപാര്ശ ചെയേ്ണ്ടത്.സര്ക്കാര് വാഹനം ദുരുപയോഗം ചെയ്താല് പിഴയും വകുപ്പുതല നടപടിയുമാണ് ശിക്ഷ.എന്നാല് നടപടികള്ക്കു കാലതാമസം പിടിക്കുമെന്നതിനാല് ഉദ്യോഗസ്ഥര്ക്ക് വീണ്ടും ഉപയോഗിക്കാന് അവസരം ലഭിക്കുന്നു.
സംസ്ഥാനത്ത് സര്ക്കാര് വാഹനം ഉപയോഗിച്ച് വീട്ടില് പോകാനും ഓഫീസില് എത്താനും അധികാരമുള്ള ഉദ്യോഗസ്ഥരെ സംബന്ധിച്ച് 2003-ലെ ജി.ഒ (എം.എസ്) നമ്പര് 113 പ്രകാരം സര്ക്കാര് വ്യക്തമായ ഉത്തരവിറക്കിയിട്ടുണ്ട്. പ്രിന്സിപ്പല് സെക്രട്ടറിമാര്, സെക്രട്ടറിമാര്, സ്പെഷല് സെക്രട്ടറിമാര്, കമ്മിഷണറേറ്റിലെ കമ്മിഷണര്മാര്, ജില്ലാ കലക്ടര്മാര്, ജില്ലാ ജഡ്ജിയും അതിനു മുകളിലുള്ള ജുഡീഷ്യല് ഓഫീസര്മാര്, പോലീസ് കമ്മിഷണര്മാര്, എസ്.പിമാര്, ഫോറസ്റ്റ് കണ്സര്വേറ്റര്മാരും അതിനു മുകളിലുള്ളവരും, സഹകരണ വകുപ്പിലെ രജിസ്ട്രാര്മാര്, ലേബര് കമ്മിഷണര്, ചീഫ് എന്ജിനീയര്മാര്, മന്ത്രിമാരുടെ പ്രൈവറ്റ് സെക്രട്ടറിമാര്, എല്ലാ വകുപ്പുകളുടെയും മേധാവികള്, പൊതുമേഖലാ സ്ഥാപനങ്ങളുടെ ചീഫ് എക്സിക്യൂട്ടീവുമാര്, സ്വയംഭരണ സ്ഥാപനങ്ങളുടെ മേധാവികള്, എന്നിവര്ക്കാണ് ഇങ്ങനെ വാഹനം ഉപയോഗിക്കാന് അധികാരമുള്ളതെന്ന് ഈ ഉത്തരവില് വ്യക്തമാക്കിയിട്ടുണ്ട്.
അതിനുശേഷം 2008 ഓഗസ്റ്റ് രണ്ടിനു ധനകാര്യ വകുപ്പും ഒരു സര്ക്കുലറിലൂടെ ഇക്കാര്യം ഓര്മപ്പെടുത്തുകയണ്ടായി. എന്നാല്, ഇതൊന്നും കണക്കിലെടുക്കാതെയാണ് ഉദ്യോഗസ്ഥര് യഥേഷ്ടം സര്ക്കാര് വാഹനങ്ങള് ദുരുപയോഗം ചെയ്യുന്നത്. വാഹനങ്ങളൂടെ യാത്ര സംബന്ധിച്ച ലോഗ്ബുക്കില് ക്രമക്കേടു കാണിച്ചാണ് സര്ക്കാര് ഉദ്യോഗസ്ഥര് വാഹനങ്ങള് സ്വന്തം ആവശ്യത്തിനു ഉപയോഗപ്പെടുത്തുന്നത്. സര്ക്കാര് വാഹനങ്ങളുടെ ബോര്ഡുകള് എടുത്തുമാറ്റിയും ഉപയോഗപ്പെടുത്തുന്നു. ബോര്ഡില്ലാതെയോ ബോര്ഡ് മറച്ചുവച്ചോ സര്ക്കാര് വാഹനങ്ങള് ഉപയോഗിക്കരുതെന്നും സര്ക്കാര് വ്യക്തമാക്കിയിട്ടുണ്ട്. വാഹനങ്ങളുടെ ദുരുപയോഗം തടയുന്നതില് പൊതുജനങ്ങള് ഇടപെടാത്തത് ഉദ്യേഗസ്ഥര്ക്കു കരുത്തു പകരുന്നുണ്ട്. ഉദ്യോഗസ്ഥര്ക്ക് വീട്ടില് പോകാന് വാഹനം ഉപയോഗിക്കാമെന്ന ധാരണയാണ് മിക്കവര്ക്കുമുള്ളത്.
അതിനാല് ആരും പരാതിപ്പെടാന് തയാറാകുന്നില്ല. അഴിമതിയും ക്രമക്കേടും വാഹന ദുരുപയോഗവും തടയാന് ധനകാര്യ വകുപ്പിന്റെ ഇന്സ്പെക്ഷന് വിഭാഗം എല്ലാ ജില്ലകളിലും പ്രവര്ത്തിക്കുന്നുണ്ട്. ഒരു ജില്ലാ ഓഫീസറുടെ നേതൃത്വത്തിലാണ് ഈ ഓഫീസ്. ഇത്തരം അഴിമതി സംബന്ധിച്ച് പൊതുജനങ്ങള്ക്ക് ഈ ഓഫീസില് വിവരം അറിയിക്കാവുന്നതാണ്. ഇതിന് പ്രത്യേകം മൊബൈല് നമ്പറും ഓരോ ജില്ലകളിലും നല്കിയിട്ടുണ്ട്. ഇവിടെ കിട്ടുന്ന വിവരങ്ങള് രഹസ്യമായാണ് സൂക്ഷിക്കുക
https://www.facebook.com/Malayalivartha
