പ്രധാനമന്ത്രി നരേന്ദ്ര മോദിയെ വ്യക്തിപരമായി അധിക്ഷേപിച്ച് പ്രസംഗം നടത്തിയ മന്ത്രി എം.എം മണിക്കെതിരെ ബി.ജെ.പി പൊലീസില്‍ പരാതി നല്‍കി. പ്രധാനമന്ത്രി ഭാര്യയെ ഉപേക്ഷിച്ചത് ജീവശാസ്ത്രപരമായി കുഴപ്പം ഉള്ളതുകൊണ്ടാണെന്നായിരുന്നു മന്ത്രിയുടെ പരാമര്‍ശം. മലപ്പുറം ജില്ലാ പൊലീസ് സൂപ്രണ്ടിനാണ് ബി.ജെ.പി പരാതി നല്‍കിയിരിക്കുന്നത്.

പാര്‍ട്ടി പരിപാടിയില്‍ സംസാരിക്കവെയായിരുന്നു മന്ത്രിയുടെ വിവാദമായ പരാമര്‍ശം ഉണ്ടായത്. ഭാര്യയെ ഉപേക്ഷിച്ചതിനെ മോദി മഹത്വവത്കരിക്കുകയാണെന്നും സ്വന്തം അമ്മയെ നോട്ടുമാറ്റിവാങ്ങാന്‍ ക്യൂവില്‍ നിര്‍ത്തിയ ആളാണ് മോദിയെന്നും മന്ത്രി കുറ്റപ്പെടുത്തിയിരുന്നു. സ്വന്തം ഭാര്യയോട് പോലും മര്യാദ കാട്ടാത്തയാളാണ് മോദിയെന്നും അദ്ദേഹം പറഞ്ഞു.

മണിയുടെ വിവാദ പരാമര്‍ശങ്ങള്‍ക്കെതിരെ ബി.ജെ.പി മുന്‍ സംസ്ഥാന അധ്യക്ഷന്‍ പി.കെ കൃഷ്ണദാസ് കഴിഞ്ഞ ദിവസം രംഗത്തെത്തിയിരുന്നു. മന്ത്രി മണിക്ക് ഷോക്ക് ട്രീറ്റ്‌മെന്റ് നല്‍കാന്‍ മുഖ്യമന്ത്രി മുന്‍കൈയ്യെടുക്കണമെന്നും മനോനില നഷ്ടപ്പെട്ട അദ്ദേഹത്തെ കുതിരവട്ടത്തോ ഊളന്‍പാറയിലോ അഡ്മിറ്റ് ചെയ്യണമെന്നും അദ്ദേഹം ആവശ്യപ്പെട്ടു. സ്ഥലകാലബോധം ഇല്ലാതെ പെരുമാറുന്ന വ്യക്തിയെ മന്ത്രിയാക്കിയത് പിണറായി വിജയന് പറ്റിയ മറ്റൊരു വീഴ്ചയാണെന്നും കൃഷ്ണദാസ് കുറ്റപ്പെടുത്തി.

എം.എം മണി വൈദ്യുതകുപ്പ് തന്നെ ഭരിക്കുന്നതിനാല്‍ ഷോക്ക് ട്രീറ്റമെന്റിന് പണം നല്‍കേണ്ടതില്ലെന്നും കൃഷ്ണദാസ് അഭിപ്രായപ്പെട്ടു.