പെണ്‍ സുഹൃത്തിനൊപ്പം ബൈക്കില്‍ സഞ്ചരിച്ചതിനു പെണ്‍കുട്ടിയുടെ പിതാവ് കൈയേറ്റം ചെയ്യുകയും തുടര്‍ന്ന് ദുരൂഹസാഹചര്യത്തില്‍ മരണപ്പെടുകയും ചെയ്ത ബിരുദ വിദ്യാര്‍ത്ഥിയുടെ മരണം തലയ്ക്കടിയേറ്റെന്ന് പോസ്റ്റ് മോര്‍ട്ടം റിപ്പോര്‍ട്ട്. കഴിഞ്ഞ 31 നാണ് വേളി ക്ലേ ഫാക്ടറിക്ക് സമീപമുള്ള റെയില്‍വേ ട്രാക്കില്‍ തിരുവനന്തപുരം വാഴിച്ചല്‍ ഇമ്മാനുവല്‍ കോളേജിലെ ഒന്നാം വര്‍ഷ ബി കോം ട്രാവല്‍ ആന്‍ഡ് ടൂറിസം വിദ്യാര്‍ത്ഥിയും വട്ടിയൂര്‍ക്കാവ് സ്വദേശിയുമായ കൃഷ്ണനുണ്ണിയുടെ മൃതദേഹം കണ്ടത്. മൃതശരീരത്തില്‍ ട്രെയിന്‍ തട്ടിയ പാടുകളൊന്നും ഇല്ലാത്തതിനാല്‍ മരണത്തില്‍ ദുരൂഹതയുണ്ടെന്ന് ആരോപണം ഉയര്‍ന്നിരുന്നു. 

സഹപാഠിയായ പെണ്‍കുട്ടിയുമായി കൃഷ്ണനുണ്ണി പ്രണയത്തിലായിരുന്നു. മാര്‍ച്ച് 30 ന് ബന്ധുവിന്റെ മരണ വീട്ടില്‍ പോകാനായി ഇരുവരും വൈകിട്ട് അഞ്ചരയോടെ ഒന്നിച്ച് ബൈക്കില്‍ സഞ്ചരിച്ചിരുന്നു. ഇത് അറിഞ്ഞതോടെ പെണ്‍കുട്ടിയുടെ പിതാവ് വഴയില ജംഗ്ഷനില്‍ ഇരുവരെയും തടയുകയും. കൃഷ്ണനുണ്ണിയെ നാട്ടുകാര്‍ നോക്കി നില്‍ക്കെ കയ്യേറ്റം ചെയ്യുകയും ചെയ്തിരുന്നു. പെണ്‍കുട്ടിയുടെ പിതാവ് കൃഷ്ണനുണ്ണിയുടെ വീട്ടുകാരെ ഫോണില്‍ ബന്ധപ്പെട്ട മകന്‍ തന്റെ കസ്റ്റഡിയിലാണെന്നും മകളുടെ കൂടെ ഇനിയും ഒന്നിച്ചു കണ്ടാല്‍ പ്രശ്നം വഷളാകുമെന്നും പറഞ്ഞു. പൊലീസിനെയും വിവരമറിയിച്ചു. പിറ്റേന്ന് കൃഷ്ണനുണ്ണിയെയും കൂട്ടി സ്റ്റേഷനിലെത്താന്‍ വീട്ടുകാരോട് പൊലീസ് നിര്‍ദേശിക്കുകയും ചെയ്തു. 

ഇതിനുശേഷം കൃഷ്ണനുണ്ണിയെ കാണുന്നത് മരിച്ച നിലയില്‍ റെയില്‍വേ ട്രാക്കിനു സമീപമാണ്. തലയ്ക്ക് പിന്നിലേറ്റ ക്ഷതമാണ് മരണകാരണമെന്ന പോസ്റ്റുമോര്‍ട്ടം റിപ്പോര്‍ട്ട് കൂടി പുറത്തുവന്ന സാഹചര്യത്തില്‍ കൃഷ്ണനുണ്ണിയുടേത് കൊലപാതകമാണെന്ന ബന്ധുക്കളുടെയും സുഹൃത്തുക്കളുടെയും വാദത്തിനു കൂടുതല്‍ ബലമേറുകയാണ്. മരണത്തില്‍ സംശയം പ്രകടിപ്പിച്ച് ബന്ധുക്കള്‍ നേരത്തെ സിറ്റി പൊലീസ് കമ്മീഷണര്‍ക്ക് നല്‍കിയ പരാതിയില്‍ ഇത് സംബന്ധിച്ച ആശങ്കകള്‍ സൂചിപ്പിച്ചിരുന്നു.