തൊഴിലാളികള് ആശങ്കയില്; കെ.എസ്.ആര്.ടി.സിയില് ഒറ്റ ഡ്യൂട്ടി വരുന്നു
കെ.എസ്.ആര്.ടി.സിയില് ഒറ്റഡ്യൂട്ടി സമ്പ്രദായം കൊണ്ടുവരാന് നീക്കം. ആദ്യം ഓര്ഡിനറി സര്വീസില് ഒറ്റ ഡ്യൂട്ടി കൊണ്ടുവന്നു പിന്നീടു പൂര്ണതലത്തില് നടപ്പാക്കാനാണു തീരുമാനം. സുശീല് ഖന്ന റിപ്പോര്ട്ടിന്റെ മറപിടിച്ചു ഒറ്റ ഡ്യൂട്ടി സമ്പ്രദായം ആരംഭിക്കാനുള്ള നീക്കം കെ.എസ്.ആര്.ടി.സിയ്ക്കു നേരിയ സാമ്പത്തിക നേട്ടമുണ്ടാകുമെങ്കിലും നൂറുകണക്കിനു എം പാനല് ജീവനക്കാര്ക്കു തൊഴില് നഷ്ടമുണ്ടാക്കും.
നിലവില് കെ.എസ്.ആര്.ടി.സിയില് രണ്ടു ഡ്യൂട്ടി സമ്പ്രദായമാണു നിലനില്ക്കുന്നത്. അതായത് ഒരു ദിവസം ജോലി ചെയ്താല് അടുത്ത ദിവസം വിശ്രമിക്കാം. കെ.എസ്.ആര്.ടി.സിയുടെ സാമ്പത്തിക നഷ്ടം കുറയ്ക്കാനെന്ന പേരില് ഒറ്റ ഡ്യൂട്ടി സമ്പ്രദായം ആരംഭിക്കാനാണു നീക്കം നടക്കുന്നതെങ്കിലും വിശ്രമമില്ലാതെ ജോലി ചെയ്യുന്നത് അപകട സാധ്യത വര്ധിപ്പിക്കുമെന്നു തൊഴിലാളികള് ചൂണ്ടിക്കാട്ടുന്നു.
ഒറ്റ ഡ്യൂട്ടി സമ്പ്രദായം നിലവില് വന്നാല് 24- 25 ദിവസം ജോലി ചെയ്യേണ്ടി വരും. ദിവസവും 10- 13 മണിക്കൂര് വരെ ജോലി ചെയ്യേണ്ടി വരുന്ന ജീവനക്കാര്ക്ക് ഇത് ഏറെ ബുദ്ധിമുട്ടു സൃഷ്ടിക്കും. കഴിഞ്ഞ ദിവസം വയനാട് ചുരത്തില് കെ.എസ്.ആര്.ടി.സി. ബസ് അപകടത്തില്പ്പെട്ടതും വിശ്രമമില്ലാതെയുള്ള െ്രെഡവറുടെ ജോലിയാണെന്നു ജീവനക്കാര് ചൂണ്ടിക്കാട്ടുന്നു. കെ.എസ്.ആര്.ടി.സിയെ നവീകരിക്കാനുള്ള സുശീല് ഖന്ന റിപ്പോര്ട്ടിന്റെ അടിസ്ഥാനത്തിലാണ് ഒറ്റ ഡ്യൂട്ടി സമ്പ്രദായം ആരംഭിക്കുന്നത്.
എന്നാല്, റിപ്പോര്ട്ട് തയ്യാറാക്കുന്നതിനു മുന്നോടിയായി താഴേത്തട്ടിലുള്ള തൊഴിലാളികളുടെ പ്രതികരണമൊന്നുംതേടിയിരുന്നില്ലെന്നും യൂണിയന് നേതാക്കളുടെയും പാസഞ്ചേഴ്സ് അസോസിയേഷന് ഭാരവാഹികളുടെയും പ്രതികരണം മാത്രമാണു ശേഖരിച്ചതെന്നും ആരോപണമുണ്ട്.
സൂപ്പര് ക്ലാസ് സര്വീസുകളില് സ്ഥിരം ജീവനക്കാര് മാത്രമെന്ന സമ്പ്രദായം കഴിഞ്ഞദിവസം മുതല് കര്ശനമാക്കിയതും ഒറ്റ ഡ്യൂട്ടി ആരംഭിക്കുന്നതിനാണെന്നു തൊഴിലാളികള് കരുതുന്നു. ഡിപ്പോയിലെ ഏറ്റവും മുതിര്ന്ന െ്രെഡവറും കണ്ടക്ടറും സൂപ്പര് ക്ലാസിലെ ആദ്യവണ്ടിയില് ജോലി ചെയ്യണമെന്നാണു നിര്ദേശം. മുമ്പ് എം. പാനല് ജീവനക്കാരെ സൂപ്പര് ക്ലാസ് സര്വീസുകളില് നിയോഗിച്ചിരുന്നു. മിക്ക ഡിപ്പോയിലെയും മുതിര്ന്ന ജീവനക്കാര് ശരാശരി 52 വയസ് പ്രായക്കാരാണ്.
സൂപ്പര് ക്ലാസിലെ ഏറ്റവും പ്രധാന സര്വീസ് 14 മണിക്കൂറോ അതിലേറെയോ ഡ്യൂട്ടി സമയമുള്ള ദീര്ഘദൂര സര്വീസുകളായിരിക്കും. പ്രായമേറിയവര് ദീര്ഘദൂര സര്വീസുകള് തുടര്ച്ചയായി കൈകാര്യം ചെയ്യേണ്ടിവരുന്നത് അപകടങ്ങള്ക്കു കാരണമാകുമെന്ന് ആശങ്കയുണ്ട്. നിര്ദേശം കര്ശനമായി പാലിക്കണമെന്നു ചൂണ്ടിക്കാട്ടി കഴിഞ്ഞദിവസം ഡിപ്പോകളിലേക്കു ചീഫ് ഓഫീസറുടെ കാര്യാലയത്തില്നിന്നു വീണ്ടും നിര്ദേശം വന്നിരുന്നു. ചില ഡിപ്പോകളില്നിന്ന് ഇതിന്റെ പേരില് പരാതിയും ഉയര്ന്നിട്ടുണ്ട്.
https://www.facebook.com/Malayalivartha
