മലയിന്‍കീഴ് നിന്നും ഭാര്യയോടും മകളോടുമൊപ്പം അടിച്ച് പൊളിക്കാനായി മൂന്നാറിലെത്തിയപ്പോള്‍ അതൊരു ദുരന്തമാകുമെന്ന് ഒരിക്കലും കരുതിയില്ല. മൂന്നാറില്‍ വിനോദയാത്രയ്ക്കിടെ, ഭാര്യ ഓടിച്ച കാറിടിച്ച് മരണമടഞ്ഞ മച്ചേല്‍ അശോകഭവനില്‍ അശോകന്റെ (36) ദുരന്തം ബന്ധുക്കളെയും നാട്ടുകാരെയും കണ്ണീരിലാഴ്ത്തി. സംഭവത്തില്‍ മനം നൊന്ത് കഴിയുന്ന ഭാര്യയെ ആശ്വസിപ്പിക്കാനാകാതെ ബന്ധുക്കളും. 

വീട്ടിലും നാട്ടിലും പ്രിയപ്പെട്ടവനായിരുന്നു മോനി എന്ന് വിളിക്കുന്ന അശോകന്‍. 1997 ല്‍ എസ്.എസ്.എല്‍.സി പരീക്ഷയില്‍ പതിമ്മൂന്നാം റാങ്കും വൊക്കേഷണല്‍ ഹയര്‍ സെക്കന്‍ഡറി പരീക്ഷയില്‍ മികച്ച വിജയവും തിരുവനന്തപുരം എന്‍ജിനിയറിംഗ് കോളേജില്‍ നിന്ന് ഇലക്ട്രോണിക്‌സ് ആന്‍ഡ് കമ്മ്യൂണിക്കേഷനില്‍ പതിനേഴാം റാങ്കും ഐ.ഐ.ടിയില്‍ 25ആം റാങ്കും നേടിയിരുന്നു. എന്ത് സംശയത്തിനും അശോകന്‍ ഒരു വിജ്ഞാനകോശമായിരുന്നുവെന്നാണ് സുഹൃത്തുക്കള്‍ ഓര്‍ക്കുന്നത്.

എന്‍ജിനിയറിംഗ് പഠനകാലത്തെ പ്രണയിനിയായ രശ്മിയെ വീട്ടുകാരുടെ സമ്മതത്തോടെ എട്ട് വര്‍ഷം മുന്‍പാണ് വിവാഹം കഴിച്ചത്. മക്കളായ ശ്രേയ, ശ്രദ്ധ എന്നിവരോടൊപ്പം അടുത്തിടെയാണ് കുടുംബ വീട്ടിലെത്തിയത്. പാര്‍ട്ട്‌സുകളാക്കി കൊണ്ട് വന്ന് കൂട്ടിച്ചേര്‍ത്ത സൈക്കിളില്‍ നാട് ചുറ്റാന്‍ പോകുന്ന കാഴ്ച കണ്ണില്‍ നിന്ന് മായുന്നില്ലെന്ന് ഒരു ബന്ധു വിതുമ്പലോടെ പറഞ്ഞു. ബാംഗ്ലൂരില്‍ താമസമായതോടെയാണ് അശോകന് സൈക്കിള്‍ ഇഷ്ട വാഹനമായത്.

വേനലവധി ആഘോഷത്തിനു മൂന്നാറിലേക്കു തിരിച്ച കുടുംബമാണ് അപകടത്തില്‍പ്പെട്ടത്. ശനിയാഴ്ച വൈകിട്ട് ആറുമണിയോടെ ഉടുമല്‍പേട്ട അന്തര്‍സംസ്ഥാന പാതയില്‍ വാഗുവാര എസ് വളവിനു സമീപമായിരുന്നു ദുരന്തം . തിരുവനന്തപുരം സ്വദേശിയായ അശോക് ഭാര്യ രശ്മി (32), മക്കളായ ശ്രദ്ധ (7), ശ്രേയ (5) എന്നിവരോടൊപ്പം ശനിയാഴ്ച രാവിലെയാണ് മൂന്നാറിലേക്കു തിരിച്ചത്. സൈക്ലിങ്ങില്‍ ആകൃഷ്ടനായ അശോക് കാറിനു മുകളില്‍ സൈക്കിളും കരുതിയിരുന്നു. 

തേയിലക്കാടുകളും മലനിരകളും കണ്ടതോടെ അശോക് സൈക്കിളില്‍ യാത്ര തുടരാന്‍ തീരുമാനിച്ച് കാര്‍ ഭാര്യ രശ്മിയെ ഏല്‍പ്പിച്ചു. രശ്മി വാഹനം ഓടിക്കാന്‍ ആരംഭിച്ച് അല്‍പ സമയത്തിനകം അപകടം സംഭവിച്ചു. മക്കള്‍ ആവശ്യപ്പെട്ടതനുസരിച്ച് ഡ്രൈവിങ്ങിനിടയില്‍ പാട്ടു കേള്‍ക്കാന്‍ സെറ്റ് പ്രവര്‍ത്തിപ്പിക്കുന്നതിനിടെ നിയന്ത്രണം നഷ്ടപ്പെട്ട കാര്‍ അശോക് സഞ്ചരിച്ച സൈക്കിളില്‍ ഇടിച്ചു. കാറിനടിയില്‍പ്പെട്ട അശോകിനെ ഉടന്‍ മറ്റൊരു വാഹനത്തില്‍ ടാറ്റാ ടീ ജനറല്‍ ആശുപത്രിയില്‍ എത്തിച്ചെങ്കിലും മരിച്ചു.

മച്ചേല്‍ അശോക ഭവനില്‍ സുകുമാരന്‍ നായരുടെയും വിജയമ്മയുടെയും മകനാണ് അശോകന്‍. ശനിയാഴ്ച വൈകിട്ടോടെയാണ് അശോകന് അപകടം സംഭവിച്ചതായി പിതാവിന് വിവരം ലഭിക്കുന്നത്. ഉടനെ ഭാര്യ വിജയമ്മയുമായി മൂന്നാറിലേക്ക് പുറപ്പെടുകയായിരുന്നു. മിലിട്ടറിയിലുള്ള അശോകന്റെ സഹോദരന്‍ അനീഷ്‌കുമാറും മൂന്നാറിലെത്തിയിട്ടുണ്ട്. മൃതദേഹം സഹോദരന്റെ മച്ചേല്‍ മുളമൂട് പുണര്‍തത്തില്‍ എത്തിച്ചശേഷം വീട്ടുവളപ്പില്‍ സംസ്‌കരിക്കും.