ശ്രമങ്ങളൊന്നും ഫലിച്ചില്ല, ഒടുവില് രക്ഷയില്ലാതെ കള്ളന് തിരുവാഭരണങ്ങള് ഭഗവാനു തന്നെ കാണിക്കയിട്ടു
അമ്പലപ്പുഴ ശ്രീകൃഷ്ണസ്വാമി ക്ഷേത്രത്തില്നിന്നു കാണാതായ നവരത്നം പതിച്ച തിരുവാഭരണ മാലയും പതക്കവും കാണിക്കവഞ്ചികളില് നിക്ഷേപിച്ച നിലയില് തിരികെക്കിട്ടി. ഉച്ചയ്ക്ക് 2.30 നു ഗുരുവായൂരപ്പന് നടയ്ക്ക് സമീപത്തെ കാണിക്കവഞ്ചിയില് നിന്നു മാലയും വൈകിട്ടു നാലിന് ഗണപതികോവിലിനു മുന്നിലുള്ള കാണിക്കവഞ്ചിയില് നിന്നു പതക്കവും ലഭിച്ചു. പത്രക്കടലാസില് പൊതിഞ്ഞ നിലയിലാണ് ഇവ കണ്ടെടുത്തത്.
ആഭരണങ്ങള് കാണാതായതിനു പിറ്റേന്നടക്കം രണ്ടു തവണ ക്ഷേത്രത്തിലെ മുഴുവന് കാണിക്കവഞ്ചികളും തുറന്നുപരിശോധിച്ചിരുന്നു. അന്നില്ലാതിരുന്ന ആഭരണങ്ങളാണ് ഇന്നലെ തിരിച്ചുകിട്ടിയത്. പോലീസ് അന്വേഷണം ശക്തമായതോടെ മോഷ്ടാവ് ആഭരണങ്ങള് കാണിക്കവഞ്ചിയിലിട്ടതാണെന്നു കരുതുന്നു.
പതക്കം ഒടിഞ്ഞ നിലയിലായിരുന്നു. മരതകവും പവിഴവും പതിച്ച മാല ഉരുക്കാന് ശ്രമിച്ചതിന്റെ ലക്ഷണങ്ങളുമുണ്ട്. കള്ളന് പല ശ്രമങ്ങളും നടത്തിയിട്ടും രക്ഷയില്ലാതെയാണ് തിരികെ കൊണ്ടു വന്ന് ഭഗവാനു തന്നെ കാണിക്കയിട്ടത്.
ദേവസ്വം ബോര്ഡ് ഉദ്യോഗസ്ഥരുടെ സാന്നിധ്യത്തില് ഇന്നലെ കാണിക്കവഞ്ചികളിലെ പണം എണ്ണിത്തിട്ടപ്പെടുത്താനുള്ള പതിവു പരിശോധനയിലാണ് ആഭരണങ്ങള് കണ്ടുകിട്ടിയത്. കാണാതായ ആഭരണങ്ങള് തന്നെയാണ് ഇവയെന്ന് ക്ഷേത്രം മേല്ശാന്തി, ദേവസ്വം ബോര്ഡ് അധികൃതര് എന്നിവരെത്തി തിരിച്ചറിഞ്ഞു. ഇവ ഇന്ന് അമ്പലപ്പുഴ കോടതിയില് ഹാജരാക്കും. െ്രെകംബ്രാഞ്ചും ദേവസ്വം വിജിലന്സും ശക്തമായ അന്വേഷണം നടത്തുന്നതിനിടെയാണ് തിരുവാഭരണങ്ങള് നാടകീയമായി തിരിച്ചുകിട്ടിയത്.
https://www.facebook.com/Malayalivartha