വിഎസിന്റെ ആവശ്യങ്ങളൊന്നും അംഗീകരിക്കാതെ സര്ക്കാര്
പിണറായി വിജയന് മുഖ്യമന്ത്രിയായതോടെ ശരിക്കും തഴഞ്ഞിരിക്കുകയാണ് മുതിര്ന്ന നേതാവ് വിഎസ് അച്യുതാനന്ദനെ. ഭരണപരിഷ്കാര കമ്മീഷന് ചെയര്മാന് സ്ഥാനം വിഎസിന് നല്കിയിട്ടുണ്ടെങ്കിലും വിഎസിന്റെ ആവശ്യങ്ങളോട് മുഖം തിരിച്ചിരിക്കുകയാണ് സര്ക്കാര്. വിഎസിന്റെ ആവശ്യങ്ങളൊന്നും സര്ക്കാര് അംഗീകരിക്കുന്നില്ലെന്നാണ് റിപ്പോര്ട്ടുകള്. മലയാള മനോരമയാണ് വാര്ത്ത റിപ്പോര്ട്ട് ചെയ്തിരിക്കുന്നത്. കഴിഞ്ഞ ഓഗസ്റ്റ് 18നാണ് കമ്മിഷന് ചെയര്മാനായി വിഎസിനെയും അംഗങ്ങളായി മുന് ചീഫ് സെക്രട്ടറിമാരായ സിപി നായരെയും നീല ഗംഗാധരനെയും നിയമിച്ചത്. ചുമതലയേറ്റ് പത്ത് മാസം കഴിഞ്ഞിട്ടും വിഎസിനും അംഗങ്ങള്ക്കും ശമ്പളം നല്കാതിരുന്നത് ഏറെ വിവാദമായിരുന്നു.
ഏറെ വിവാദങ്ങള്ക്കു ശേഷം കഴിഞ്ഞ മാസം മുതലാണ് വിഎസിന് ശമ്പളം അനുവദിച്ച് തുടങ്ങിയത്. ക്യാബിനറ്റ് പദവിക്ക് അനുസരിച്ചുള്ള ശമ്പളവും മറ്റ് ആനുകൂല്യങ്ങളും വിഎസിനുണ്ട്. നിലവില് ഒരു മന്ത്രിക്ക് ലഭിക്കുന്നത് അരലക്ഷത്തില്പരം രൂപയാണ്. വിഎസിനു പുറമെ പതിനൊന്ന് പേഴ്സനല് സ്റ്റാഫില് ഒമ്പത് പേര്ക്കും ശമ്പളം ലഭിക്കുന്നുണ്ട്. എന്നാല് സര്ക്കാര് സര്വീസില് നിന്ന് വിരമിച്ച ശേഷം പേഴ്സനല് സ്റ്റാഫിലെത്തിയ രണ്ടു പേര്ക്കും ശമ്പളം അനുവദിച്ച ഉത്തരവ് എപ്പോള് ഇറങ്ങുമെന്ന് വ്യക്തമല്ല. ചീഫ് സെക്രട്ടറിയുടെ ശമ്പളവും ആനുകൂല്യങ്ങളുമാണ് കമ്മീഷന് അംഗങ്ങള്ക്ക് അനുവദിച്ചിരിക്കുന്നത്. കമ്മീഷന് അംഗങ്ങള്ക്ക് ജീവനക്കാരെ നിയമിക്കുന്നതുമായി ബന്ധപ്പെട്ട ഫയലുകള് സെക്രട്ടറിയേറ്റിലാണ്. ഇക്കാര്യത്തില് ഇതുവരെ തീരുമാനം എടുത്തിട്ടില്ല. ഇക്കാര്യത്തില് തീരുമാനം എടുക്കണമെന്നാവശ്യപ്പെട്ട് വിഎസ് നിരന്തരം കത്തുകള് അയക്കുന്നുണ്ട്.
ആവശ്യങ്ങള് അറിയിച്ചുകൊണ്ട് വിഎസ് നിരന്തരം കത്തുകളയച്ചിട്ടും മറപടി നല്കുന്നില്ല.നടപടിയും സ്വീകരിക്കുന്നില്ല. കമ്മീഷനു നിര്ദേശങ്ങളും അഭിപ്രായങ്ങളും അറിയിക്കാന് അതതു വകുപ്പുകള് പ്രത്യേകം സംവിധാനം ഒരുക്കണമെന്നാവശ്യപ്പെട്ടും വിഎസ് കത്തയച്ചിട്ടുണ്ട്.
ഇന്സ്റ്റിറ്റിയൂട്ട് ഓഫ് മാനേജ്മെന്റ് ഇന് ഗവണ്മെന്റ് സമുച്ചയത്തിലെ പഴയ കെട്ടിടമാണ് കമ്മീഷന്റെ ഓഫീസിനായി അനുവദിച്ചിരിക്കുന്നത്. ഇവിടെ അഞ്ചു പേര്ക്ക് മാത്രമെ ഇരിക്കാനാവൂ. മറ്റുള്ളവര് വിഎസിന്റെ ഔദ്യോഗിക വസതിയായ കവഡിയാര് ഹൗസിലിരുന്നാണ് വര്ക്ക് ചെയ്യുന്നത്. ഐഎംജിയില് സിപി നായര്ക്കും നീല ഗംഗാധരനും മുറികള് അനുവദിച്ചിട്ടുണ്ടെങ്കിലും പെയിന്റ് അടിക്കുക മാത്രമാണ് ചെയ്തിരിക്കുന്നത്. മറ്റ് ഒരുക്കങ്ങള് നടത്തിയിട്ടില്ല. പഴയ ലക്ചര് ഹാളാണ് വിഎസിന്റെ ഓഫീസ്. എന്നാല് ഇവിടെ അറ്റകുറ്റപ്പണികളൊന്നും കഴിഞ്ഞിട്ടില്ല. ഓഫീസ് സജ്ജമാകാത്തതിനാല് കമ്മീഷന്റെ യോഗങ്ങള് നടക്കുന്നത് കവടിയാര് ഹൗസിലാണ്. കമ്മീഷന് അംഗം ഷീല തോമസിന്റെ നേതൃത്വത്തില് 12 ജീവനക്കാര് സെക്രട്ടറിയേറ്റില് പ്രവര്ത്തിക്കുന്നുണ്ട്.
https://www.facebook.com/Malayalivartha
