ബിജെപിയ്ക്കെതിരെ പ്രതികരിച്ച് കോണ്ഗ്രസുകാരുടെ പണി പോയി
കണ്ണൂരില് മാടിനെയറുത്ത സംഭവത്തില് കോണ്ഗ്രസ് നടപടി എടുത്തു. റിജില് മാക്കുറ്റിയടക്കം മൂന്നു യൂത്ത് കോണ്ഗ്രസുകാര്ക്കാണ് സസ്പെന്ഷന്. കന്നുകാലി കശാപ്പ് നിരോധന ഉത്തരവില് പ്രതിഷേധിച്ച് കണ്ണൂര് ടൗണില് യൂത്ത് കോണ്ഗ്രസ് പ്രവര്ത്തകര് പരസ്യമായി മാടിനെ അറുത്ത സംഭവത്തില് കെ.പി.സി.സി റിപ്പോര്ട്ട് ആവശ്യപ്പെട്ടു. അടിയന്തരമായി റിപ്പോര്ട്ട് സമര്പ്പിക്കാന് ഡിസിസിക്ക് നിര്ദേശം നല്കുകയും ചെയ്തു.
കശാപ്പ് നിയന്ത്രണത്തില് പ്രതിഷേധിക്കാന് കണ്ണൂരില് കാളക്കുട്ടിയെ പരസ്യമായി പൊതുവഴിയില് അറുത്ത് ഇറച്ചി വിതരണം നടത്തിയ യൂത്ത് കോണ്ഗ്രസിന്റെ നടപടിയ്ക്കെതിരേ കോണ്ഗ്രസ് ഉപാദ്ധ്യക്ഷന് രാഹുല്ഗാന്ധിയും രംഗത്തെത്തിയിരുന്നു. നടപടിയെ രൂക്ഷമായി വിമര്ശിച്ച രാഹുല് അത്യന്തം ക്രൂരമായ പ്രവര്ത്തിയാണ് ഇതെന്നും അമിതാവേശം ആണെന്നും ശക്തമായി അപലപിക്കുന്നതായും അറിയിച്ചു.
തന്റെ പ്രതിഷേധം ട്വിറ്ററിലൂടെ വ്യക്തമാക്കിയ രാഹുല് ഇത്തരം നിന്ദ്യവും നീചവുമായ പ്രവര്ത്തനങ്ങള് അംഗീകരിക്കാന് കഴിയുന്നതല്ലെന്നും ശക്തമായി അപലപിക്കുന്നതായും വ്യക്തമാക്കി. കണ്ണൂര് സിറ്റിയില് നടന്ന പ്രതിഷേധ പരിപാടിയിലാണ് യൂത്ത്കോണ്ഗ്രസ് കണ്ണൂര് ലോക്സഭാ മണ്ഡലം കമ്മറ്റി കാളക്കൂട്ടിയെ പരസ്യമായി അറുത്ത് മാംസ വിതരണം നടത്തിയത്. സംഭവത്തില് യുവമോര്ച്ചയുടെ പരാതിയുടെ അടിസ്ഥാനത്തില് കണ്ണൂര് പോലീസ് കേസെടുത്തിട്ടുണ്ട്.
കണ്ണൂര് പാര്ലമെന്റ് മണ്ഡലം പ്രസിഡന്റ് റിജില് മാക്കുറ്റി ഉള്പ്പെടെയുള്ളവരുടെ നേതൃത്വത്തില് നടത്തിയ പ്രതിഷേധരീതിക്കെതിരേ കോണ്ഗ്രസ് നേതൃത്വത്തില്നിന്നും മറ്റു കോണുകളില്നിന്നും വ്യാപക പ്രതിഷേധമുയര്ന്നിരുന്നു. സമരരംഗത്തു സജീവമായുള്ള ഇടതു സംഘടനകളും യൂത്ത് കോണ്ഗ്രസ് സമര രീതിക്കെതിരേ വിമര്ശനമുന്നയിച്ചിട്ടുണ്ട്. അംഗീകൃത കശാപ്പുശാലകളില്വച്ച് മാത്രമേ നിയമപ്രകാരം മാടുകളെ അറുക്കാന് പാടുള്ളൂ. ലൈസന്സുള്ളവര്ക്കു മാത്രമേ വില്പ്പന നടത്താനുമാകൂ. ഇത് നഗ്നമായി ലംഘിച്ചു നടത്തിയ സമരം കേരളത്തിലെ ബീഫ് ഫെസ്റ്റ് ഉള്പ്പെടെയുള്ള സമരങ്ങളുടെ മുനയൊടിക്കുമെന്ന വിമര്ശനമാണ് ഉയരുന്നത്.
https://www.facebook.com/Malayalivartha
